अहमदाबाद - अहमदाबाद विमानतळावर शुक्रवारी रात्री मोठी दुर्घटना टळली. धावपट्टीवर अचानक ससा आल्याने स्पाइसजेट आणि इंडिगो विमानाची टक्कर होता होता राहिली.

स्पाइसजेट उड्डाण घेत असताना त्याचवेळी इंडिगो एअरलाइन्सचे विमान पार्किंगकडे जात होते; परंतु इंडिगोचे विमान अजूनही धावपट्टीवरच असल्याचे पाहून स्पाइसजेटचा वैमानिकाची गाळण उडाली. कारण इंडिगोच्या विमानाचा मागील भाग धावपट्टीवरच असल्याने वैमानिकाने तत्काळ एअर ट्रॅफिक कंट्रोलला या प्रकाराची माहिती दिली; परंतु वैमानिकाला पार्किंगकडे जात असताना अचानक धावपट्टीवर ससा आल्याने ब्रेक लावावा लागला, असे इंडिगोच्या अहवालात म्हटले आहे. त्यामुळे विमानाचा मागील भाग रनवेवरच होता. दुसरीकडे स्पाइसजेटच्या वैमानिकाने अहवालात म्हटले, की इंडिगोच्या विमानाला टेक-ऑफच्या रनवेपासून बाजूला होण्याची परवानगी मिळाली नव्हती. या घटनेची डीजीसीए चौकशी करत असल्याचे सांगण्यात आले.