Mizoram Mine Collapse :

मिझोरामची राजधानी आयझॉलच्या जवळ मोठी दुर्घटना घडली आहे. मुसळधार पावसामुळे एक खाण कोसळल्याने मोठी दुर्घटना घडली. आतापर्यंत या घटनेत 10 कामगारांना जीव गमवावा लागला. आणखी काही लोक अडकले असल्याचा अंदाज व्यक्त करण्यात आला आहे.

पोलीस आणि इतर प्रशासकीय यंत्रणेकडून बचावकार्य सुरू आहे. पावसामुळे नद्यांच्या पाणी पातळीत वाढ होत असून अनेक नागरिकांना सुरक्षित स्थळी हलवण्यात येत आहे.

पोलिसांनी दिलेल्या माहितीनुसार, आज सकाळी परिसरात सतत पाऊस पडत असताना हा अपघात झाला. पोलिसांनी सांगितले की, ही घटना सकाळी 6 च्या सुमारास आयझॉल शहराच्या दक्षिणेकडील सीमेवर असलेल्या मेल्थम आणि हॅलिमेन दरम्यानच्या भागात घडली. एका पोलीस अधिकाऱ्याने सांगितले की, अनेक मृतदेह बाहेर काढण्यात आले आहेत तर अनेक लोक ढिगाऱ्याखाली अडकले आहेत. मुसळधार पावसामुळे बचावकार्यावर परिणाम होत आहे.

अनेक ठिकाणी भूस्खलन झाले

अधिकाऱ्यांनी सांगितले की, पावसामुळे राज्यात अनेक ठिकाणी भूस्खलनही झाले आहे. हुंथरमधील राष्ट्रीय महामार्ग 6 वर भूस्खलन झाले. याशिवाय अनेक आंतरराज्य महामार्गांनाही भूस्खलनाचा फटका बसला आहे.

पावसामुळे सर्व शाळा बंद ठेवण्यात आल्या असून अत्यावश्यक सेवा देणारे वगळता सरकारी कर्मचाऱ्यांना घरून काम करण्यास सांगण्यात आले आहे. आसाम आणि इतर ईशान्येकडील राज्यांमध्ये येत्या काही दिवसांत अतिवृष्टीचा इशारा हवामान खात्याने दिला आहे.