धुळवडीला मित्रांसोबत नाचत असताना तरुणाने अचानक स्वतःवर चाकून वार केले. यामध्ये तरुणाचा मृत्यू झाला. मध्य प्रदेशातील इंदूरमधील (Indore Madhya Pradesh) बाणगंगा परिसरात उत्सवादरम्यान ही घटना घडली असून परिसरात खळबळ माजली आहे.

गोपाळ, असे या मृत व्यक्तीचे नाव आहे. बाणगंगा येथे धुमधडाक्यात धुळवड साजरी केली जात होती. यावेळी तरुण डिजे लावून नाचत होते. सर्वजण उत्सवाचा आनंद घेत असताना एक तरुण हातात चाकू घेऊन नाचत होता. त्याने अचानक स्वतःवरच चाकूचे वार केले. यामध्ये तो गंभीर जखमी झाला. त्यानंतर त्याला तत्काळ रुग्णालयात दाखल करण्यात आले. पण, तोपर्यंत उशिर झाला होता. डॉक्टरांनी त्याला मृत घोषित केले. दरम्यान, उत्सवादरम्यान नाचतानाचे क्षण काहींनी मोबाईलमध्ये कैद केले. त्यामध्येच हा तरुण स्वतःवर चाकूने वार करत असल्याचं थरारक दृश्य कॅमेऱ्यात कैद झाले. हा व्हिडिओ सध्या सोशल मीडियावर व्हायरल होत आहे.

घटनेची माहिती मिळताच पोलिसांनी घटनास्थळी धाव घेतली. तसेच पंचनामा करून मृतदेह शवविच्छेदनासाठी श्री अरबिंदो इन्स्टिट्यूट ऑफ मेडिकल सायन्सेस (SAIMS) येथे पाठवण्यात आला आहे. याप्रकरणी गुन्हा दाखल करण्यात आला असून पुढील तपास सुरू आहे, असं बाणगंगा पोलिस ठाण्याचे तपास अधिकारी योगेश सिंग यांनी सांगितलं.