मणिपूर निवडणुकीच्या (Manipur Assembly Election) दुसऱ्या टप्प्यातील मतदानाला सुरुवात झालीय. 22 जागांवर आज 92 उमेदवार निवडणूक रिंगणात आहेत. तर, एकूण 1247 मतदान केंद्रं उभारण्यात आली असून निवडणूक आयोगाकडून कडेकोट सुरक्षा व्यवस्था करण्यात आलीय. निवडणुकीच्या या दुसऱ्या टप्प्यात अनेक बड्या नेत्यांचं भवितव्य ईव्हीएममध्ये कैद होणार आहे.

आज मणिपूरचे (Manipur Assembly Constituency) तीन वेळा मुख्यमंत्री ओ इबोबी सिंग (O Ibobi Singh) आणि माजी उपमुख्यमंत्री गायखंगम गंगमेई (Gaikhangam Gangmei) यांचं भवितव्यही जनता ठरवणार आहे. दोन्ही नेते काँग्रेसच्या तिकिटावर निवडणूक लढवत आहेत. दुसऱ्या टप्प्यात Thoubal, Chandel, Ukhrul, Senapati, Tamenglong आणि Jiribam जिल्ह्यात मतदान होत असून एकूण 8.38 लाख मतदार आपला मतदानाचा हक्क बजावत आहेत.

या निवडणुकीदरम्यान एक धक्कादायक प्रकरण समोर आलंय. करोंग (Karong) मतदान केंद्रावर झालेल्या गोळीबारात एका व्यक्तीचा मृत्यू झाल्याची बातमी समोर आलीय. गर्दी पांगवण्यासाठी पोलिसांनी गोळाबार केल्यामुळं त्या व्यक्तीचा मृत्यू झाल्याचा आरोप करोंग येथील भाजप (BJP) उमेदवारानं केलाय. याबाबतचा अधिक तपास पोलिस करत असून या घटनेनंतर काही काळ मतदान केंद्रावर तणाव निर्माण झाला होता. या निवडणुकीत भाजप 22, काँग्रेस 18, एनपीपी 11, नागा पीपल फ्रंटचे 10 उमेदवार रिंगणात आहेत. प्रत्येकाकडून विजयाचे मोठ-मोठे दावे केले जात आहेत.