इम्फाळ : मणिपूर विधानसभा निवडणुकीची रणधुमाळी सुरू असताना आज तृणमूल कॉंग्रेसला धक्का बसला. राज्यातील तृणमूल काँग्रेसचे एकमेव आमदार तोंगब्रम रोबिंद्रो आणि काँग्रेसचे माजी आमदार वाय सुरचंद्र यांनी आज भाजप पक्षात प्रवेश केला. आमदार तोंगब्रम रोबिंद्रो हे विष्णूपूरच्या थंगा विधानसभा मतदारसंघाचे प्रतिनिधित्व करतात तर वाई सूरचंद्र काकिंग जिल्ह्यातील काकचिंग विधानसभा मतदारसंघाचे प्रतिनिधित्व करत होते.(Manipur Legislative Assembly election 2022 Trinamool MLA joins BJP)

भाजप मुख्यालयात आयोजित कार्यक्रमात भाजप मणिपूरचे प्रदेशाध्यक्ष ए.शारदा देवी, भाजपचे सहप्रभारी अशोक सिंघल, माजी खासदार भाभानंद यांनी तोंगब्रम आणि वाई सूरचंद्र यांचे स्वागत गेले. यावेळी अशोक सिंघल म्हणाले, की आगामी निवडणुकीत भाजप किमान ४० जागा जिंकून मणिपूरमध्ये सरकार स्थापन करेल. मणिपूरच्या ६० जागांसाठी २७ फेब्रुवारी आणि ३ मार्चला मतदान होणार आहे. पहिल्या टप्प्यांत ३८ जागांवर तर दुसऱ्या टप्प्यांत २२ जागांवर मतदान होईल. भाजपमध्ये सामील झालेले सुरचंद्र म्हणाले, की शारिरीक रुपाने आपण काँग्रेससमवेत असलो तरी माझे हृदय भाजपसमवेत होते. परंतु आज पूर्णपणे भाजपचा झालो आहे. काकिंग जिल्ह्यात पक्षाला अधिकाधिक मत देण्यासाठी प्रयत्नशील राहू.