इम्फाळ : मणिपूरमध्ये हिंसाचाराने रौद्र रुप धारण केले असून धक्कादायक घटना समोर येत आहेत. शेकडो समाजकंटकांनी जखमी मुलाला दवाखान्यात घेऊन जाणारी एक रुग्णवाहिका पेटवून दिल्याने तिघांचा होरपळून मृत्यु झाल्याची दुर्देवी घटना पश्‍चिम इम्फाळच्या इसोइसेम्बा येथे रविवारी घडली.

चार दिवसांनंतर ही घटना उघडकीस आली. मृतांत ८ वर्षाच्या जखमी मुलाचा समावेश होता. त्यांचे मृतदेह अद्याप सापडले नसल्याचे सूत्राने सांगितले. तोंसिंग हैंगिंग (वय ८), मीना हैंगिंग (वय ४५) आणि लिडिया लोरेम्बम (वय ३७) अशी मृतांची नावे आहेत.

पोलिस अधिकाऱ्याने दिलेल्या माहितीनुसार, गोळीबारात एका लहान मुलाच्या डोक्याला गोळी लागली होती. त्याला उपचारासाठी रुग्णवाहिकेतून इम्फाळला नेण्यात येत होते. यावेळी त्याच्यासमवेत त्याची आई आणि अन्य एक नातेवाईक होते.

परंतु वाटेत अचानक मोठ्या जमावाने रुग्णवाहिका थांबविली आणि ती पेटवून दिली. यात तिघांचा जागीच मृत्यू झाला. आसाम रायफल्सच्या एका वरिष्ठ अधिकाऱ्यांनी या घटनेला दुजोरा दिला आहे. या घटनेनंतर घटनास्थळी आणि परिसरात सुरक्षा व्यवस्थेत वाढ करण्यात आली.

गोळीबारात झाला होता जखमी

कांगचुप येथे आसाम रायफल्सच्या मदत छावण्यात असंख्य पीडित नागरिक राहत आहेत. चार जून रोजी सायंकाळी अचानक या भागात चकमक सुरू झाली. त्यामुळे संशयित दहशतवादी आणि सुरक्षा दल यांच्यात धुमश्‍चक्री सुरू झाली. यावेळी छावणीत राहणाऱ्या एका मुलाच्या डोक्याला गोळी लागली.

आसाम रायफल्सच्या वरिष्ठ अधिकाऱ्यांनी त्या मुलाला तत्काळ इम्फाळला घेऊन घेण्याबाबत हालचाली सुरू केल्या. यासाठी रुग्णवाहिका मागविली. आई बहुसंख्याक समुदायातील असल्याने जखमी मुलाला रस्ते मार्गाने इम्फाळच्या क्षेत्रिय आयुर्विज्ञान संस्थानमध्ये नेण्याचा निर्णय घेण्यात आला.

मात्र सायंकाळी ६.३० च्या सुमारास इसोइसेम्बा येथे शेकडो नागरिकांनी रुग्णवाहिकेला अडविले आणि आग लावली. यात तीन जणांचा होरपळून मृत्यू झाला. त्यांचे मृतदेह सापडले नसल्याचे सूत्राने सांगितले.

शहांच्या घरासमोर अचानक आंदोलन

गृहमंत्री अमित शहा यांच्या निवासस्थानासमोर आज कुकी आदिवासी समुदायाच्या आंदोलकांनी आंदोलन केल्याने पोलिसांची तारांबळ उडाली. अमित शहा यांचे निवासस्थान कृष्ण मेनन रस्त्यावर आहे. या भागात कायम सुरक्षा दल तैनात असते.

परंतु आज सकाळी मणिपूरमधील कुकी समुदायातील काहीजण या परिसरात येऊन आंदोलन करू लागल्याने पोलिसांनी त्यांना ताब्यात घेतले. सध्या मणिपूरमध्ये दोन समुदायात संघर्ष सुरू आहे. अमित शहा यांना भेटण्याची त्यांची मागणी होती. काही वेळाने आंदोलकांपैकी काही जणांनी अमित शहा यांची निवासस्थानी भेट घेतली. यानंतर आंदोलकांना सोडून देण्यात आले.