नवी दिल्ली : कोरोना चाचण्या (Corona tests) आणि होम आयसोलेशनमध्ये (Home Isolations) उपचार घेत असलेल्या रुग्णांबाबत केंद्र सरकारनं राज्ये आणि केंद्र शासित प्रदेशांना मंगळारी काही महत्वाच्या सूचना केल्या. व्हर्च्युअली पार पडलेल्या कोरोना संसर्गासंबंधीत या आढावा बैठकीत नऊ राज्यांना आणि केंद्रशासित प्रदेशांना सतर्कतेचा इशाराही केंद्रीय आरोग्य मंत्री मनसुख मांडविय (Mansukh Mandiviya) यांनी दिला. (Mansukh Mandviya given imp instuctions about corona tests and home isolaton patients to states)

मांडवीय यांनी राज्यांना कोरोनाच्या चाचण्या आणि लसीकरणाचा डेटा वेळेवर देण्याच्या सूचना केल्या तसेच ज्या राज्यांमध्ये चाचण्यांच प्रमाण कमी झालंय त्यांना चाचण्या वाढवण्यास सांगण्यात आलं आहे. त्याचबरोबर मोठ्या प्रमाणावर सध्या लोक होम आयसोलेशनमध्ये राहून उपचार घेत आहेत. अशा रुग्णांवर राष्ट्रीय मार्गदर्शक सूचनांनुसार लक्ष ठेवण्यास सांगितलं आहे.

केंद्रीय आरोग्य मंत्र्यांनी बोलावलेल्या या बैठकीत जम्मू आणि काश्मीर, हिमाचल प्रदेश, पंजाब, हरयाणा, उत्तराखंड, दिल्ली, लडाख, उत्तर प्रदेश आणि चंदीगड या राज्यांचे आरोग्य मंत्री सहभागी झाले होते. यापूर्वी आरोग्यमंत्र्यांनी महाराष्ट्र, मध्य प्रदेश, राजस्थान, गुजरात, गोवा तसेच दादरा-नगर हवेली, दीव-दमणच्या आरोग्य मंत्र्यांशी आणि मुख्य सचिवांशी चर्चा केली होती.