पाटणा, ता. २१ (पीटीआय) : राष्ट्रीय लोकशाही आघाडीचे बिहारमधील एकमेव मुस्लिम खासदार मेहबूब अली कैसर यांनी आज आपल्या लोक जनशक्ती पक्षाला रामराम करत राष्ट्रीय जनता दलात प्रवेश केला.

ऐन निवडणुकीत हे पक्षांतर झाल्याने ‘इंडिया’ आघाडीला बळ मिळाल्याचे मानले जात आहे. लोक जनशक्ती पक्षात फूट पडली त्यावेळी कैसर यांनी पशुपती पारस यांची बाजू घेतली होती. नंतर त्यांनी चिराग पासवान यांच्याशी जुळवून घेण्याचा प्रयत्न केला असला तरी त्यांना तिकीट नाकारण्यात आले. त्यामुळेच त्यांनी पक्षांतर करण्याचा निर्णय घेतल्याचे समजते. तेजस्वी यादव यांच्या उपस्थितीत त्यांनी आज ‘आरजेडी’मध्ये प्रवेश केला.