नवी दिल्ली : विदेशातील ५० टक्के पर्यटक फक्त मुघल वास्तूकला पाहण्यासाठी भारतात येतात, तर उर्वरीत ५० टक्के पर्यटक काश्मीर पाहण्यासाठी येतात, असा दावा जम्मू-काश्मीरच्या माजी मुख्यमंत्री मेहबूबा मुफ्ती (Mehbooba Mufti) यांनी केला आहे. तसेच पर्यटक ज्या गोष्टी पाहण्यासाठी भारतात येतात त्या दोन्ही गोष्टी भाजपने उद्ध्वस्त केल्या आहेत, असा आरोपही त्यांनी केला.

उजव्या विचारसरणीच्या संघटनांनी दिल्लीतील कुतुबमिनारच्या बाहेर निदर्शने करत कुतुबमिनारचं नाव विष्णूस्तंभ ठेवण्याची मागणी केली होती. तसेच दिल्ली भाजपने राष्ट्रीय राजधानीतील अकबर रोड, हुमायून रोड, औरंगजेब लेन आणि तुघलक लेन यांसारख्या इतर महत्त्वाच्या खुणा मुघल शासकांच्या नावावर असल्याने त्यांची नावे बदलण्याची मागणी केली होती. यावरूनच मेहबूबा मुफ्ती यांनी हे वक्तव्य केलं आहे.

राहुल भट या काश्मिरी पंडिताची हत्या करण्यात आली. गुरुवारी, 14 मे रोजी चदूरा येथील तहसीलदार कार्यालयात दहशतवाद्यांनी त्यांना गोळ्या घालून ठार केले. दुसऱ्याच दिवशी याच जिल्ह्यातील गुडूरा येथे कॉन्स्टेबल रियाझ अहमद ठोकर यांच्यावर गोळ्या झाडण्यात आल्या. जखमी अवस्थेत त्याचा मृत्यू झाला. त्यानंतर काश्मीरमध्ये कायदा आणि सुव्यवस्थेचा प्रश्न निर्माण झाला असून काश्मिरी पंडीत रस्त्यावर उतरले आहेत. आम्ही या ठिकाणी सुरक्षित नाही म्हणत निदर्शने करत आहेत.

मेहबूबा मुफ्ती यांनी देखील राहुल भटच्या हत्येनंतर काश्मीरमधील तापलेल्या वातावरणावर भाष्य केले. भारत सरकारने काश्मीरबाबतचा आपला दृष्टिकोन बदलावा. सरकारने काश्मिरींवर दबाव आणला आहे आणि त्यांना हिंदू विरुद्ध मुस्लीम दंगली भडकवून इतर मुद्द्यांपासून दूर जात आहे, असा आरोप देखील मेहबुबा मुफ्ती यांनी केला.