जगभरात दिवसेंदिवस नरेंद्र मोदींचा (Narendra Modi) प्रभाव वाढताना दिसत आहे. त्यातच आता केंद्रीय मंत्र्यानं मोदींबाबत मोठं वक्तव्य केलंय. पंतप्रधान नरेंद्र मोदी हे गरीब आणि दलित (Dalit Community) वर्गासाठी देवता समान आहेत, असं केंद्रीय जलशक्ती मंत्री गजेंद्र सिंह शेखावत (Gajendra Singh Shekhawat) यांनी म्हटलंय. शेखावत यांनी चित्तौडगड इथं "@20 सपने हुए साकार"मध्ये मोदी सरकारच्या योजनांवर भाष्य केलंय.

मोदींनी आठ वर्षांच्या कारकिर्दीत दलितांचं संपूर्ण आयुष्य बदललं, ते लोक मोदींकडं मसिहा म्हणून पाहत आहेत. पंतप्रधान मोदींच्या 8 वर्षांच्या शासन काळात ज्या लोकांच्या जीवनात परिवर्तन झालं आहे, त्यांना मोदी देवासमान वाटतात. संमेलनात उपस्थित असलेले आदिवासी वर्गातून येणारे, अनुसूचित जमाती अथवा दलित समाजातील लोक मोदींना सन्मान मिळवून देणारे देव पुरुष म्हणून पाहू लागले आहेत, असंही शेखावत यांनी स्पष्ट केलं.

विज्ञानाच्या क्षेत्रात काम करणाऱ्या वैज्ञानिकांना पंतप्रधान मोदी वैज्ञानिक म्हणून अधिक वाटतात. तरुणांना स्टार्ट अपचे मार्गदर्शक तर ज्या लोकांना वीज आणि पाण्याची सुविधा उपलब्ध करून दिली, त्यांच्यासाठी मोदी एक साथी आहेत. एकूणच काय तर, ज्या लोकांनी मोदींना ज्या रुपात बघितलं मोदी त्यांना तसेच दिसून आले, असं सांगत शेखावात यांनी मोदींचं तोंडभरुन कौतुक केलंय.