हैदराबाद : तेलंगणाचे कामगार मंत्री एम. मल्ला रेड्डी (M. Malla Reddy) यांच्या ताफ्यावर काही लोकांनी घाटकेसर इथं एका जाहीर सभेत हल्ला केलाय. ते थोडक्यात बचावले आहेत. दरम्यान, सभेसाठी जाणाऱ्या मंत्र्याच्या ताफ्यावर बूट, दगड आणि खुर्च्या फेकण्यात आल्यानं त्यांना अचानक सभा सोडावी लागलीय. रेड्डींनी सभेत तेलंगणा राष्ट्र समिती (TRS) सरकार आणि मुख्यमंत्री के. चंद्रशेखर राव (K. Chandrasekhar Rao) यांचं कौतुक केलं होतं.

मंत्र्यानं मुख्यमंत्र्यांचं कौतुक करताच काही लोक मंचाकडं धावले आणि त्यांनी भाषण थांबवण्यास सांगितलं. काँग्रेसच्या (Congress) एका नेत्यानं रेड्डींना सरकारचं गुणगान थांबवून समाजाच्या भल्याचं बोला, असं सांगितलं. गदारोळ होत असताना आयोजकांच्या आवाहनानंतर मल्ला रेड्डींनी आपलं भाषण थांबवलं. मात्र, सभेदरम्यान काही काळ गोंधळ पहायला मिळाला.

मंत्री सतत सरकारचं गुणगान गात असताना सभेला उपस्थित असलेल्यांनी त्यांना अडवून त्यांच्या विरोधात घोषणाबाजी केली. दरम्यान, संतप्त लोकांनी मंत्री रेड्डींचा ताफा कार्यक्रमस्थळावरून निघून जात असताना बूट, दगड आणि खुर्च्या फेकण्यास सुरुवात केली. त्यांच्यापैकी काहींनी ताफ्याचा पाठलागही केला. या बैठकीला विविध राजकीय पक्षांचे नेते व कार्यकर्ते उपस्थित होते. रेड्डींच्या संयुक्त कृती समितीनं मुख्यमंत्र्यांनी 5,000 कोटी रुपयांसह रेड्डीज आयोग (Reddy's Commission) स्थापन करण्याचं त्यांचं निवडणूक आश्वासन पूर्ण करावं, अशी मागणी केलीय. मल्ला रेड्डी यांनी या हल्ल्यासाठी प्रदेश काँग्रेसचे अध्यक्ष रेवंत रेड्डी (Revanth Reddy) यांना जबाबदार धरलंय.