Baba Ramdev: रामदेव बाबा यांना सुप्रीम कोर्टाने चांगलेच फटकारले आहे. पतंजली आयुर्वेदच्या दिशाभूल करणाऱ्या जाहिरातीवरील सुनावणीदरम्यान कोर्टाचा अपमान केल्याप्रकरणी खंडपीठाने तिव्र शब्दात बाबा रामदेव यांना खडसावले. न्यायमूर्ती हिमा कोहली आणि अहसानुद्दीन अमानुल्ला यांच्या खंडपीठाने बाबा रामदेव आणि आचार्य बाळकृष्ण यांना थेट प्रश्न विचारले.

पुढील सुनावणी ३० एप्रिलला होणार असून  सुनावणीदरम्यान बाबा रामदेव आणि आचार्य बाळकृष्ण यांनाही न्यायालयात हजर राहण्याचे निर्देश देण्यात आले आहेत. पंतजलीने ६७ वृत्तपत्रांमध्ये माफीनामा प्रसिद्ध केला. यावर खंडपीठाने नाराजी व्यक्त केली.

खंडपीठाने रामदेव आणि बाळकृष्ण यांना तुमची जाहिरात कुठून प्रसिद्ध केली आणि एवढा वेळ का लागला, अशी विचारणा केली. या जाहिराती एकाच आकाराच्या होत्या, तुम्ही नेहमी एकाच आकाराच्या जाहिराती देता का?

यावर रामदेव यांच्या वकिल म्हणाले, नाही सर.. त्याची किंमत खूप जास्त आहे.. लाखो रुपये...आम्ही माफीनामा प्रसिद्ध केला आहे, जाहिरात नाही.

पतंजली प्रकरणात कोर्ट काय म्हणत आहे ते टीव्ही चॅनेल्सवर दाखवले जात असल्याचेही न्यायालयाने म्हटले आहे. त्याचबरोबर पतंजलीची जाहिरातही एका भागात चालवली जात आहे. हे प्रकरण केवळ पतंजलीचे नाही, तर इतर कंपन्यांच्या दिशाभूल करणाऱ्या जाहिरातींचेही आहे. जे प्रकाशित होते त्यापेक्षा तुम्हाला कमाईची जास्त काळजी वाटत नाही का?, असा प्रश्न कोर्टाने उपस्थित केला.

आम्हाला एक अर्ज आला आहे, ज्यामध्ये पतंजलीविरोधात अशी याचिका दाखल केल्याबद्दल आयएमएला 1,000 कोटी रुपयांचा दंड ठोठावण्यात यावा, अशी मागणी करण्यात आली आहे. असे दिसते की, ही तुमच्या वतीने प्रॉक्सी याचिका आहे, असे कोर्टाने विचारले. यावर रामदेव यांचे वकील मुकुल रोहतगी म्हणाले की, माझा याच्याशी काहीही संबंध नाही.