नवी दिल्ली- २७ वर्षीय मॉडेल आणि गँगस्टर संदीप गडोलीची गर्लफ्रेंड दिव्या पहुजा हिची हरियाणाच्या गुरुग्राममध्ये गोळ्या घालून हत्या करण्यात आली आहे. विशेष म्हणजे दिव्या पहुजा हिला सात वर्षाचा तुरुंगवास झाला असून ती जामीनावर बाहेर होती. बुधवारी रात्री गुरुग्रामच्या एका हॉटेलमध्ये तिला संपवण्यात आलंय.(Model Divya Pahuja Shot Dead In Gurugram Hotel Was Jailed For Role In Gangster Killing)

२०१६ मध्ये दिव्याचा अंडरवर्ल्डशी संबंध आला. त्यावेळी ती केवळ १८ वर्षांची होती. मोस्ट वाँटेड गँगस्टर संदीप गडोली याच्या खोट्या एनकाऊंटर प्रकरणात पोलिसांनी तिला अटक केली होती. मुंबईच्या अंधेरीतील हॉटेलमध्ये आला असताना पोलिसांनी २०१६ मध्ये गडोलीचा एनकाऊंटर केला होता. त्यावेळी दिव्या देखील त्याठिकाणी उपस्थित होती. हा एनकाऊंटर हरियाणा पोलिसांनी केला होता. त्यांनतर काही पोलीस आणि दिव्या हिची अटक झाली होती.

सात वर्षाची शिक्षा भोगल्यानंतर दिव्याला मुंबई हायकोर्टाने जून २०२३ मध्ये जामीन मंजूर केला होता. पण, तिच्या मागील संकट टळलं नाही. पोलिसांनी दिलेल्या माहितीनुसार, हॉटेल मालक आणि त्याच्या दोन कर्मचाऱ्यांनी तिला हॉटेलमध्ये गोळी घातली. या प्रकरणात तिघांना अटक करण्यात आली आहे.

हॉटेल मालक अभिजित सिंग याने सांगितलं की, दिव्या काही अश्लील फोटो व्हायरल करण्याची धमकी देत होती आणि त्याबदल्यात पैसे मागत होती. त्यामुळे त्याने दोन साथीदारांच्या मदतीने तिला गोळी घातली. दिव्याच्या कुटुंबियांनी हा दावा फेटाळला आहे.

दिव्याची बहीण नैना हिने पोलीस स्टेशनमध्ये तक्रार दाखल केली आहे. तिने या हत्येमागे गडोली कुटुंबियांचा हात असल्याचा आरोप केला आहे. संदीप गडोलीची बहीण सुदेस कटारिया आणि भाऊ ब्राहम प्रकाश कटारिया यांनी तिला संपवण्यासाठी अभिजित सिंगला पैसे दिल्याचा दावा नैना हिने केलाय. सीसीटीव्ही फुटेजमध्ये दिसतंय की, अभिजित सिंग त्याच्या दोन मित्रांसह दिव्याच्या मृतदेहाची विल्हेवाट लावत आहेत. (Latest Marathi News)