Monsoon Updates: काल मान्सूनचे केरळमध्ये आगमन झाल्यानंतर दरवर्षी पेक्षा वेळेआधी मान्सून दाखल झाला आहे. येत्या जुन महिन्याच्या पहिल्या आठवड्यात मान्सून महाराष्ट्रात दाखल होण्याची शक्यता आहे. हवामान खात्याने सांगितल्याप्रमाणे मान्सूनच्या आगमनाचे सर्व निकष पूर्ण झाले आहेत. केरळमध्ये मान्सून दाखल झाल्यानंतर पुढील सहा ते सात दिवसांमध्ये तळकोकणात आणि महाराष्ट्रात दाखल होत असतो. दरम्यान, केरळच्या दक्षिण भागांत गेल्या 24 तासांमध्ये कमी अधिक प्रमाणात हलका पाऊस सुरु झाला आहे. हा पाऊस वाऱ्यासह वर सरकत आहे.

केरळमध्ये मान्सून दाखल झाल्यानंतर त्याच्या पुढचा वेग मंदावण्याची शक्यताही हवामान विभागाने वर्तवली आहे. त्यामुळं पुढील दोन आठवडे मान्सूचा वेग कमी राहू शकतो. मात्र, मान्सूनचा वेग कायम राहिल्यास मान्सून तळकोकणात ४ ते ५ जूनपर्यंत पोहोचू शकतो. तर, मुंबई आणि पुण्यात मान्सून ७ ते ८ जूनपर्यंत पोहोचू शकतो, असा अंदाज हवामान खात्याने दिला आहे.

दरम्यान, मान्सून केरळमधील कन्नूर, पल्लकड आणि मदूराईमध्ये दाखल झाला असून तो वेगाने वर सरकत आहे. त्यामुळे केरळमधील काही भागांत हलक्या स्वरुपाचा पाऊस सुरु झाला आहे. मान्सून अंदमानमध्ये १६ मे रोजी दाखल झाला होता. आता मान्सून केरळमध्ये दाखल झाला आहे. दुसरीकडे मान्सून भारतात दाखल होत असताना शेतकऱ्यांकडून देखील खरिपपूर्व कामांना वेग देण्यात येत आहे. आता मान्सूनच्या अगमानामुळे शेतकऱ्यांच्या शेतमशागतीच्या तयारीला वेग आला आहे.