मध्य प्रदेशातील (Madhya Pradesh) इंदूरमध्ये आईच्या प्रेमाला काळीमा फासणारी घटना समोर आलीय. इथं एका आईनं आपलं 15 दिवसांचं नवजात बालक विकलंय. मुलाला विकून मिळालेल्या पैशातून आईनं फ्रीज, टीव्ही, वॉशिंग मशिन अशा वस्तू खरेदी केल्या आहेत. आरोपी आईनं पतीच्या संमतीनं हा व्यवहार केला होता. या प्रकरणी पोलिसांनी (Indore Police) एकूण आठ आरोपींविरुद्ध गुन्हा दाखल केला असून, त्यापैकी सहा आरोपींना पोलिसांनी अटकही केलीय.

मिळालेल्या माहितीनुसार, इंदूरच्या हीरा नगर भागात राहणाऱ्या शायना बी या महिलेनं पोलिसांना सांगितलं की, 'पतीला आमच्या बाळावर संशय होता. त्यामुळं पतीला माझा गर्भपात करायचा होता, पण आमच्याकडं वेळ खूप कमी असल्यानं आम्ही दलालांमार्फत मूल विकण्याचा बेत आखला. आम्ही आमचं बाळ देवास येथील एका जोडप्याला विकलं.' हे मूल लीना नावाच्या महिलेनं विकत घेतल्याचं पोलिसांनी सांगितलं. लीना म्हणाली की, 'अलीकडंच तिच्या दोन मुलांचा मृत्यू झाला होता. त्यामुळं तिनं मुलाला साडेपाच लाखांना विकत घेतलं.'

पोलिसांनी सांगितलं की, मुलाची विक्री केल्यानंतर मिळालेल्या पैशातून महिलेनं टीव्ही, फ्रीज, कुलर आणि वॉशिंग मशीन या वस्तू खरेदी केल्या होत्या, त्या आता जप्त करण्यात आल्या आहेत. सामाजिक कार्यकर्त्यांच्या माध्यमातून या प्रकरणाची माहिती देण्यात आली. याप्रकरणी आरोपी आई शायना बी हिच्यासह आठ जणांविरुद्ध गुन्हा दाखल करण्यात आलाय. त्यापैकी एक अल्पवयीनही आहे. यातील सहा आरोपींना अटक करण्यात आली असून दोन सध्या फरार आहेत. लवकरच फरार आरोपींनाही जेरबंद करण्यात येईल, असा दावा पोलिसांनी केलाय.