शामली : जेवत असताना भाची वारंवार आंबा मागत होती. यामुळे चिडलेल्या मामाने पाच वर्षीय भाचीची हत्या (Murder) केली. पोलिसांनी आरोपी मामा उमरदीन (३३) याला अटक केली आहे. ही घटना उत्तर प्रदेशातील (Uttar Pradesh) शामली जिल्ह्यातील खेडा कुर्तन गावात घडली. खैरू निशा असे मृत भाचीचे नाव आहे.

पोलिसांनी दिलेल्या माहितीनुसार, पाच वर्षीय भाची खैरू निशा ही जेवण करताना वारंवार आंबा मागत होती. त्यामुळे नाराज झालेल्या मामाने तिची हत्या केली. मामाने प्रथम भाचीच्या डोक्यावर रॉडने वार केले. भाचीला रक्तस्त्राव होऊ लागला तेव्हा मामाने गळा चिरून हत्या (Murder) केली. यानंतर तिचा मृतदेह गोणीत भरला, असे पोलिसांनी सांगितले.

खैरु निशा ही मजुराची मुलगी आहे. दुपारी बेपत्ता झाली होती. रात्री पोलिसांना तिचा मृतदेह आरोपी उमरदीनच्या घरात सापडला. कांधलाचे एसएचओ श्यामवीर सिंह यांनी सांगितले की, आरोपी गावकऱ्यांसोबत मुलीच्या शोधात गेला होता. मात्र, पोलिसांना संशय आल्यानंतर तो लगेच गायब झाला.

शामलीचे एएसपी ओपी सिंग यांनी सांगितले की, पोलिसांनी आरोपी उमरदीनला गावाजवळील जंगलातून अटक केली आणि त्याच्या ताब्यातून हत्येसाठी वापरलेली शस्त्रे (चाकू आणि लोखंडी रॉड) जप्त केली. आरोपीला (Accused Arrested) गुरुवारी रात्री अटक करून शुक्रवारी कारागृहात पाठवण्यात आले. पीडितेच्या वडिलांच्या तक्रारीवरून आरोपीविरुद्ध एफआयआर नोंदवण्यात आला आहे.