पंतप्रधान नरेंद्र मोदी यांनी 2024 च्या लोकसभा निवडणुकीसाठी सलग तिसऱ्यांदा वाराणसीतून निवडणूक लढवण्याचा निर्णय घेतला आहे. यानंतर आज दिग्गज नेत्यांच्या उपस्थितीत पंतप्रधानांनी आपला उमेदवारी अर्ज दाखल केला.

आज गंगा सप्तमी आणि नक्षत्रराज पुष्य असा योगायोग आहे. या रवियोगाने ग्रहांची चांगली स्थिती निर्माण होत आहे. असे मानले जाते की या दिवशी कोणतेही काम केल्याने इच्छित मनोकामना पूर्ण होतात. पुष्य नक्षत्रात कोणतेही काम केल्यास त्याची पूर्णता निश्चित मानली जाते. या विशेष योगायोगानेच पंतप्रधान मोदींनी आज आपला उमेदवारी अर्ज दाखल केल्याचे बोलले जात आहे. (PM Modi Nomination In Varanasi)

दरम्यान पंतप्रधान मोदी यांनी वाराणसी मतदारसंघातून उमेदवारी दाखल करण्यापूर्वी वाराणसी येथील काशी कोतवाल बाबा काल भैरव मंदिरात पूजा केली.

यावेळी पंतप्रधान नरेंद्र मोदी यांचा अर्ज भरण्यासाठी महाराष्ट्राचे मुख्यमंत्री एकनाथ शिंदे यांच्यासह 12 राज्यातील मुख्यमंत्री उपस्थित होते.

लोकसभा निवडणुकीसाठी वाराणसीत 1 जून रोजी शेवटच्या आणि सातव्या टप्प्यात मतदान होणार आहे. पंतप्रधान नरेंद्र मोदी यांनी यापूर्वी 2014 आणि 2019 मध्ये येथून निवडणूक लढवली होती.

पंतप्रधानांनी 2014 मध्ये पहिल्यांदा निवडणूक लढवली होती, तेव्हा येथून आम आदमी पक्षाचे प्रमुख अरविंद केजरीवाल यांनी त्यांना आव्हान दिले होते. या निवडणुकीत मोदींनी केजरीवाल यांच्या तब्बल 3 लाख 71 हजार मतांनी विजय मिळवला होता.

तर 2019 मध्ये पंतप्रधान मोदींचा विजय आणखी मोठा होता. त्यावेळी पंतप्रधानांनी समाजवादी पक्षाच्या शालीनी यादव यांचा 4 लाख 80 हजार मतांनी विजय मिळवला होता.