नवी दिल्ली : महिन्याला 100 कोटी रुपयांची वसुली करण्याचे आदेश दिल्याच्या आरोपामुळं गृहमंत्री अनिल देशमुख यांना राजीनामा द्यावा लागणार की, त्यांना क्लीन चीट मिळणार, याची संपूर्ण महाराष्ट्राला उत्सुकता लागली होती. आज, संसदेतही हा मुद्दा चर्चेत आल्यानं संपूर्ण देशाचं लक्ष याकडं लागलं आहे. या सगळ्या पार्श्वभूमीवर काल राष्ट्रवादी काँग्रेसचे अध्यक्ष शरद पवार यांनी पत्रकार परिषद घेऊन, या संदर्भात आपलं मत व्यक्त केलं होतं. त्याच वेळी त्यांनी अनिल देशमुख यांच्याशी आणि इतर मित्र पक्षांशी तसेच राष्ट्रवादीच्या नेत्यांशी चर्चा करून देशमुखांच्या राजीनाम्याचा निर्णय घेऊ, असे स्पष्ट केले होते. आज, शरद पवार यांनी त्यांच्या निवासस्थानी पत्रकार परिषद घेऊन आपली मांडली. त्यात पवार यांनी पोलिस अधिकारी परम बीर सिंग यांचे सर्व आरोप फेटाळून लावले आहेत. ज्या काळात देशमुख यांनी वसुलीचे आदेश दिल्याचा आरोप केला जात आहे. त्याकाळात देशमुख कोरोनाचे उपचार घेत होते, असा मुद्दा पवार यांनी उपस्थित करून, परम बीर सिंग यांच्या आरोपांमधील हवाच काढून घेतली.

आणखी वाचा - आरोपच खोटा तर चौकशी कसली? - शरद पवार

काय म्हणाले शरद पवार?
काल (रविवार, 21 मार्च) झालेल्या पत्रकार परिषदेत शरद पवार यांनी अनिल देशमुखांच्या राजीनाम्यावर चर्चेतून निर्णय घेणार असल्याचे सांगितले होते. नवी दिल्लीत, काल शरद पवार यांच्या निवासस्थानी राष्ट्रवादीच्या नेत्यांची बैठक झाली. त्यात जयंत पाटील, सुप्रिया सुळे, अजित पवार, प्रफुल्ल पटेल हे नेते उपस्थित होते. त्यानंतरही जयंत पाटील यांनी अनिल देशमुख यांच्या राजीनाम्याचा प्रश्नच उद्भवत नाही, असे पत्रकारांना स्पष्ट केले होते. तरीही आघाडीतील इतर नेत्यांशी चर्चा करून याबाबत निर्णय घेऊ, अशी भूमिका शरद पवार यांनी मांडली होती. त्यानंतर आज, पुन्हा पत्रकार परिषद घेत पवार यांनी अनिल देशमुख राजीनामा देणार नसल्याचे स्पष्ट केले. पोलिस अधिकारी परम बीर सिंग यांच्या आरोपांमध्ये तथ्य नसल्याचं पवार यांनी म्हटलंय. ज्या काळात देशमुखांनी वसुलीचे आदेश दिल्याचे संदर्भ पत्रात आहेत. त्या काळात अनिल देशमुख उपचार घेत होते, असं पवार यांनी पत्रकार परिषदेत सांगितलं. त्यामुळं आरोप खोटे आहेत, असं सांगून पवार यांनी देशमुखांच्या राजीनामा घेणार नसल्याची भूमिका कायम ठेवली.

(आणखी सविस्तर वृत्त थोड्याच वेळात)