नवी दिल्ली - नुकत्याच झालेल्या राष्ट्रपतीपदाच्या निवडणुकीत द्रौपदी मुर्मू यांचा दणदणीत विजय झाला आहे. मुर्मू या देशाच्या १५ व्या राष्ट्रपती म्हणून शपथ घेणार आहेत. मुर्मू यांचा सोमवारी शपथविधी पार पडणार असल्याचं सांगण्यात आलं आहे. उद्या सकाळी 10 वाजून 15 मिनिटांनी त्या राष्ट्रपतीपदाची शपथ घेणार आहेत. (New President Draupadi Murmu will take oath tomorrow)

सत्ताधारी भाजप पक्षाकडून राष्ट्रपतीपदाच्या उमेदवार द्रौपदी मुर्मू यांनी विरोधकांच्या यशवंत सिन्हा यांचा पराभव केला. त्या देशातील पहिल्या आदिवासी महिला राष्ट्रपती आहेत. राष्ट्रपतीपदाच्या निवडणुकीत एकूण 3219 मते पडली, ज्यांचे मूल्य 838839 होते. यामध्ये द्रौपदी मुर्मू यांना 2161 मते (मूल्य 577777) आणि यशवंत सिन्हा यांना 1058 मते (मूल्य 261062) मिळाली.

20 जून 1958 रोजी ओडिशाच्या मयूरगंज जिल्ह्यातील बैदपोसी गावात जन्मलेल्या द्रौपदी संथाल आदिवासी वांशिक गटातील आहे. त्यांच्या वडिलांचे नाव बिरांची नारायण तुडू आहे. त्यांचा विवाह श्यामाचरण मुर्मू यांच्याशी झाला होता. द्रौपदी यांनी त्यांचा नवरा आणि दोन मुले गमावली आहेत. त्यांना इतिश्री मुर्मू नावाची मुलगी आहे.

त्यांचे बालपण अत्यंत वंचित आणि गरिबीत गेले. मात्र त्यांनी आपल्या मेहनतीच्या जोरावर परिस्थिती आड येऊ दिली नाही आणि भुवनेश्वरच्या रमादेवी महिला महाविद्यालयातून पदवीचे शिक्षण पूर्ण केले. द्रौपदी मुर्मू आपल्या मुलीसाठी शिक्षिका म्हणून काम करू लागल्या.