नवी दिल्ली : ओमिक्रॉन या नव्या कोरोना व्हेरियंटमुळे सध्या देशात चिंतेचं वातावरण आहे. साऊथ आफ्रिकेमध्ये सर्वांत आधी आढळलेला हा व्हेरियंट आता आपले हातपाय हळूहळू पसरत असल्याचं दिसतंय. मात्र, भारतात या व्हेरियंटचा धोका किती आहे आणि आपण चिंता करण्याचं कारण कितपत आहे, हे पाहणं महत्त्वाचं ठरणार आहे. केंद्रीय आरोग्यमंत्री मनसुख मांडविय यांनी आता ओमिक्रॉनसंदर्भात एक महत्त्वाची माहिती दिली आहे. संसदेच्या हिवाळी अधिवेशनामध्ये प्रश्नोत्तराच्या सत्रामध्ये बोलताना त्यांनी म्हटलंय की, विषाणूचा नवा व्हेरियंट ओमिक्रॉन हा सर्वांत आधी दक्षिण आफ्रिकेत सापडला आहे.

पुढे ते म्हणाले की, कोरोना संकटाच्या काळात आपण बऱ्याच गोष्टी शिकलो आहोत. सध्या आपल्याकडे अनेक संसाधने आणि प्रयोशाळा आहेत. आपण कोणत्याही परिस्थितीचा सामना करु शकतो. आज सध्याच्या घडीला देशात कोरोनाचा एकही नवा व्हेरियंट ओमिक्रॉने संक्रमित रुग्ण सापडल्याची नोंद झालेली नाहीये. तसेच हा विषाणू देशात येऊच नये, यासाठी हर पातळीवर प्रयत्न केले जात आहेत.