उज्जैन: महात्मा गांधींवर वादग्रस्त वक्तव्य करणाऱ्या कालिचरण महाराजला अटक करण्यात आली होती. धर्मसंसदेमध्ये कालीचरण महाराजाविरोधात छत्तीसगड आणि महाराष्ट्रात गुन्हे दाखल करण्यात आले होते. त्याला मध्य प्रदेशमधील खजुराहो येथील बगेश्वरी धाम येथून पहाटे चार वाजण्याच्या सुमारास अटक करण्यात आली होती. इतकं सगळं झाल्यानंतरही कालीचरण महाराज आपल्या वक्तव्यावर ठाम असल्याचं दिसून येतंय. (Kalicharan Maharaj)

कारण आता कालीचरण महाराजाने उज्जैनमध्ये आपण त्या वक्तव्यांवर ठाम असल्याचं म्हटलंय. कालीचरणने म्हटलंय की, मी माझ्या वक्तव्यावर स्थिर आहे. ज्या व्यक्तीने छत्रपती शिवाजी महाराज, गुरु गोविंद सिंग, राणा प्रताप महाराजांना पथभ्रष्ट म्हटलं त्या व्यक्तीचा मी द्वेष करतो. माझी ती मते मी विचार करुनच मांडली होती. मला त्याबाबत कसलाही पश्चात्ताप नाहीये.

काही दिवसांपूर्वी रायपूर येथे झालेल्या धर्मसंसदेत कालीचरण याने महात्मा गांधींबद्दल आक्षेपार्ह वक्तव्ये केली होती. तसेच त्यांची हत्या करणाऱ्या नथुराम गोडसेचे गोडवेही गायले होते. त्याच्या त्या वक्तव्यानंतर त्याच्यावर रायपूर, अकोला आणि पुण्यात देखील तक्रारी दाखल करण्यात आल्या होत्या. त्यानंतर गायब झालेल्या कालीचरणला शोधण्यासाठी पोलिसांनी शोधमोहिम राबवली होती. त्यानंतर खजुराहो येथील बागेश्वर धाम येथील एका घरातून कालीचरणला अटक करण्यात आली.