नवी दिल्ली: ‘कोविन अॅप’ वा पोर्टलवर आता संस्था वा कंपन्या या त्यांच्या कर्मचाऱ्याने वा ग्राहकाने लस घेतली आहे किंवा नाही, याचे केवायसी व्हेरिफिकेशन स्टेटस जाणून घेऊ शकणार आहेत. आरोग्य आणि कुटुंब कल्याण मंत्रालयाने ही सुविधा नव्याने उपलब्ध करून दिली आहे.

कोविडविरोधी लसीकरण मोहीम सुरू केल्यापासून आतापर्यंत ७२ कोटींपेक्षा जास्त डोस वितरित करण्यात आले आहेत. लसीकरण केलेल्या व्यक्तीला लसीकरणाबाबत खात्री देणारे प्रमाणपत्र कोविनच्या माध्यमातून दिली जाते. हे प्रमाणपत्र स्मार्टफोन, टॅबलेट, लॅपटॉप यांसारख्या इलेक्ट्रॉनिक उपकरणांवर डिजिटल कायमस्वरूपी ठेवता येते. हे प्रमाणपत्र डीजी-लॉकर मध्ये देखील उपलब्ध होते.

मॉल, कार्यालय संकुल, सार्वजनिक कार्यक्रम अशा ठिकाणी प्रवेशासाठी असे प्रमाणपत्र द्यावे लागते. ते डिजिटल त्याचप्रमाणे प्रत्यक्ष स्वरूपातही उपलब्ध होऊ शकते. परंतु काही प्रसंगी हे प्रमाणपत्र पूर्ण पाहण्याची गरज नसते, तर समोरील व्यक्तीने लस घेतली आहे किंवा नाही ही माहिती जाणून घेणे आवश्यक असते. रोजगार देणारी संस्था, कंपनी, रेल्वे यांना संबंधितांचे लसीकरण झाले आहे किंवा नाही, याची माहिती आवश्‍यक असते.

संबंधितांच्या मोबाईल क्रमांकाने पडताळणी

एखादी कंपनी असो की रेल्वे वा विमान यांना आता त्यांच्या ग्राहकांनी लसीकरण केले नी नाही, याची माहिती कोविनद्वारे मिळू शकेल. यासाठी संबंधित व्यक्तीला केवायसी व्हीसी या सुविधेमध्ये त्यांचा मोबाईल क्रमांक टाकावा लागेल. त्यानंतर त्यांना ओटीपी पाठविला जाईल. तो टाकल्यानंतर संबंधित व्यक्तीचे लसीकरण स्टेटस तात्काळ समजेल.