नवी दिल्ली : कोरोनाच्या तिसऱ्या लाटेत ओमिक्रॉन व्हेरियंट (Omicron Variant) मुलांसाठी धोकादायक ठरणार असल्याच्या वृत्ताच्या पार्श्वभूमीवर केंद्रीय आरोग्य मंत्रालयाने १८ वर्षांच्या आतील मुलांसाठी संशोधित दिशानिर्देश आज जारी केले. त्यानुसार कोविडची लागण झाल्याची लक्षणे दिसली तरी मुलांना लगेचच विषाणूविरोधी किंवा मोनोक्लोनल अॅंटीबॉडी औषधे, प्रतिजैविके तसेच संप्रेरके (स्टेरॉईड) परस्पर देण्यास सुरवात करू नये, असा सल्ला पालकांना देण्यात आला आहे. पाच वर्षांच्या आतील बालकांना मास्क सक्तीचा नाही, असेही यात नमूद करण्यात आले आहे.

अन्य देशांच्या तुलनेत भारतीयांना ओमिक्रॉनचा गंभीर धोका पोहोचत नसल्याचे आढळले असले तरी सध्याच्या तिसऱ्या लाटेत प्रत्येकाने सावधगिरी व आरोग्य नियमांचे काटेकोर पालन सुरू ठेवणे अत्यावश्यक असल्याचे यात म्हटले आहे. या दिशानिर्देशानुसार, १८ वर्षांखालील मुलांची प्रतिकारशक्ती चांगली असल्याने त्यांना तातडीने विषाणू विरोधी औषधे सुरू करण्याची आवश्यकता नाही.

इतर दिशानिर्देशांनुसार, हलकी लक्षणे असलेल्या रुग्णांना प्रतिजैविके देऊ नयेत. मध्यम व गंभीर लक्षणे असली तरी डॉक्टरांच्या सल्ल्याशिवाय व कोरोनाचे ठोस निदान झाल्याशिवाय प्रतिजैविकांचा वापर टाळावा. प्रौढ कोरोनाग्रस्तांसाठी स्टेरॉईडसचा वापर डॉक्टरांच्या सल्ल्यानुसारच करावा. सौम्य लक्षणे असलेल्यांना ती अजिबात देऊ नयेत.

स्टेरॉइडचा वापर मर्यादित प्रमाणात व ठराविक कालावधीसाठीच करावा. गंभीर लक्षणे असलेल्या कोरोनाग्रस्तांना संप्रेरके देताना डेक्सामेथासोन ०.१५ मिलीग्रॅम (दिवसभरात ६ मिलीग्रॅम), मेथिलप्रेडनिसोलोन ०.७५ मिलीग्रॅम हे प्रमाण पाळावे. लक्षणे दिसल्यावर पहिल्या ३ ते ५ दिवसांत स्टेरॉईड सुरू करण्याचे टाळावे. रक्त गोठविणाऱ्या प्रतिजैविकांचा अतिवापर टाळावा, अशी डॉक्टरांना सूचना करण्यात आली आहे.

मुलांसाठी नवे दिशानिर्देश

• कोरोनाची लक्षणे आढळली तरी लगेच प्रतिजैविकांचा वापर नको

• स्टेरॉईडची मात्राही १० ते १४ दिवसांत कमी करावी

• अँटीकॉगुलंट औषधाचा वापर टाळावा

• हलकी लक्षणे आढळलेल्या मुलांची डॉक्टरांकडे नेऊन तपासणी करावी

• संसर्गमुक्त झाल्यानंतरही नियमित तपासणी करावी

मास्कसाठीचे दिशानिर्देश

• पाच वर्षांच्या आतील बालकांना सक्तीने मास्क लावू नये

• सहा ते ११ वयोगटातील मुलांसाठी त्यांचे आईवडील किंवा पालकांच्या देखरेखीखालीच मास्कचा सुरक्षितपणे वापर करावा

• १२ वर्षांपुढील मुलांसाठी प्रौढांप्रमाणेच मास्क वापरणे आवश्यक.

• मास्क वापरण्यापूर्वी व तो हाताळताना साबण किंवा अल्कोहोल आधारित हॅंडवॉशने हात साफ करणे गरजेचे.