नवी दिल्ली: देशात कोरोना विषाणूविरोधातला लढा सध्या सुरु आहे. गेल्या दोन वर्षांपासून कोरोना विषाणूविरोधात हा लढा सुरु आहे. सुरुवातील फ्रंट लाईन वर्कर्स, त्यानंतर वयस्कर आणि नंतर मग 18 वर्षे वयावरील लोकांना लस देण्यात आली. त्यानंतर आता 15 ते 18 वयोगटातील तरुणांनाही कोरोनाची लस देण्यात येत आहे. आतापर्यंत किती जणांना कोरोना लसीचा डोस देण्याच आला याबाबतची माहिती आता आरोग्यमंत्र्यांनी दिली आहे. 15 ते 18 वयोगटातील पाच कोटींपेक्षा अधिक तरुणांनी आतापर्यंत कोरोना लसीचा (COVID19 vaccine) पहिला डोस घेतल्याची माहिती केंद्रीय आरोग्यमंत्री मनसुख मांडविय यांनी दिली आहे. (Mansukh Mandaviya)

स्पुटनिक लाईटला मान्यता

दुसरीकडे, भारताच्या ड्रग्ज कंट्रोलर जनरलने (DCGI) भारतात सिंगल-डोस स्पुटनिक लाईट कोविड-१९ लसीला (Sputnik Light Vaccine) आणीबाणीच्या वापराची परवानगी दिली आहे. याबाबतची माहितीही केंद्रीय आरोग्य मंत्री डॉ. मनसुख मांडविया यांनी ट्विटद्वारे काल दिली होती. ही देशातील 9वी कोरोना लस असल्याचे त्यांनी ट्विट केलंय. यामुळे साथीच्या रोगाविरुद्ध देशाचा एकत्रित लढा आणखी मजबूत होईल, असंही त्यांनी ट्विटमध्ये म्हटले आहे.