कानपूरमधील अत्तर (Perfume) व्यापारी पियुष जैन यांच्या वेगवेगळ्या मालमत्तांवर आयकर विभागाचे छापे सुरू आहेत. छाप्यादरम्यान आयकर विभागाला मोठं घबाड सापडलं आहे. नोटांनी भरलेल्या कपाटांच्या रांगा पाहून अधिकाऱ्यांचेही डोळे चक्रावले. या नोटा मोजण्यासाठी टीमला अनेक तास लागले. पियुष जैन (Piyush Jain) यांच्या घराबाहेर आतापर्यंत नोटांनी भरलेले 6 बॉक्स ठेवण्यात आले आहेत. आयकर विभागाचे पथक हे बॉक्स ताब्यात घेण्याची तयारी करत आहे.

डीजीजीआय आणि इन्कम टॅक्सने गुरुवारी कन्नौजचे अत्तर व्यापारी पीयूष जैन यांच्या कानपूरमधील (Kanpur) घरावर छापा टाकला. या दरम्यान कपाटांमध्ये एवढी रक्कम सापडली की, ती मोजण्यासाठी अधिकाऱ्यांना नोटा मोजण्याचं मशीन मागवावं लागलं. छापा टाकल्यानंतर सुमारे २४ तास ही कारवाई सुरू होती.

यापूर्वी जीएसटी इंटेलिजेंस डायरेक्टरेट जनरल अहमदाबादच्या टीमने छापा टाकला होता, पण जेव्हा पीयूष जैन यांना नोटांचे ढिगारं मिळू लागले तेव्हा त्यांनी इन्कम टॅक्स टीमला पाचारण केले. नोटा मोजण्यासाठी चार मशीन मागवाव्या लागल्या असून, चोवीस तास नोटांची मोजणी सुरू होती. विशेष म्हणजे या नोटा घेऊन जाण्यासाठी इन्कम टॅक्सने आतापर्यंत ६ मोठे स्टीलचे बॉक्स मागवले आहेत. ही कारवाई अजूनही संपलेली नाही.