चेन्नई, ता. ६ : सलून व्यवसाय करणाऱ्या सी मोहन यांनी आपली मुलगी नेत्राच्या भविष्यातील उच्च शिक्षणासाठी काही रक्कम शिल्लक ठेवली होती. पण, तेरा वर्षाच्या एम. नेत्रा हिने ही रक्कम गरिबांसाठी खर्च करण्याचा हट्ट धरला. त्यामुळे वडिलांनी पाच लाख रूपयांच्या रकमेतून गरिबांना धान्य वाटप केले. पण, ही गोष्ट इथेच थांबली नाही. या मदतीची पंतप्रधानांनी आपल्या ‘मन की बात’ कार्यक्रमात दखल घेतली आणि शाबासकीची थाप दिली. तेव्हा मात्र, या कुटुंबांच्या आनंदाला पारावार राहिला नाही. 

कोरोना संसर्गामुळे जाहीर झालेल्या लॉकडाउननंतर अनेक कुटुंबांवर संकट कोसळले. त्याचवेळी अनेकांचे मदतीचे हातही पुढे आले. मदुराई जिल्ह्यातील मेलामडाई गावातील सलून व्यावसायिक मोहन यांनी मुलगी नेत्रा हिच्या शिक्षणासाठी काही रक्कम शिल्लक ठेवली होती. पण, मुलीच्या वारंवार केल्या जाणाऱ्या आग्रहापुढे वडिलांचा निश्चय ढळला आणि त्यांनी अगदी कष्टातून साठवलेले पाच लाख रूपये गरिबांसाठी खर्च केले.

शिकण्याची आस : तिनं कौलांवर शोधला शिकण्याचा मार्ग, तुम्ही कोणतं कारण देताय?

प्रसिद्धीविना दाखविलेल्या दातृत्वावर पंतप्रधान नरेंद्र मोदी यांनी ‘मन मी बात’मध्ये अभिनंदनाचा वर्षाव केला आणि ही कहाणी देशाला माहित झाली. पण मोहन यांनी याचे सर्व श्रेय आपल्या मुलीला दिले आहे.  ‘मी माझे शिक्षण चांगल्या गुणांनी पूर्ण करीन’ असे आपल्या मुलीने सांगितल्याने सर्व पाच लाख रूपये आणि बायकोच्या दागिन्यांमधून साडेतीन लाख रूपये मी गरीबांसाठी खर्च केले, अशी माहिती मोहन यांनी दिली.

कोरोनाचा कहर थांबता थांबेना! मागील 24 तासांत देशात सर्वाधिक बळींची नोंद

लॉकडाउननंतर मोहन यांना स्वत:लाही काम मिळत नव्हते. पण, त्यांनी आपल्या परिसरातील गरजूंना मदत करायचे ठरविले. पंतप्रधानांनी अभिनंदन केल्यानंतर काही मिनिटांतच वैद्यकीय अधिकारी आणि नागरिकांनी मोहन यांच्या घराकडे धाव घेऊन त्यांचे अभिनंदन केले. 

संयुक्त राष्ट्रांकडून दखल 
युनायटेड नेशन्स असोसिएशन फॉर डेव्हलपमेंट अॅंड पीस यांनी नेत्राला ‘गरिबांच्या कल्याणासाठी काम करणारी’ ॲम्बेसेडर जाहीर केले आहे. तसेच तिला संयुक्त राष्ट्रांच्या परिषदेत बोलण्याची संधी दिली जाइल. दरम्यान, तमिळनाडूचे मुख्यमंत्री इ. पिलानीस्वामी यांनीही नेत्राचे अभिनंदन करून तिच्या शिक्षणाचा खर्च करण्याची तयारी दर्शविली आहे.