नवी दिल्ली : मी आता पण सत्तेत नाही आणि भविष्यात देखील सत्तेत राहायचं नाही. मला सत्तेत राहण्यासाठी शुभेच्छा देऊ नका. मला पंतप्रधान पद हे सत्ता म्हणून महत्वाचं वाटत नाही, असं पंतप्रधान नरेंद्र मोदी (PM Narendra Modi) म्हणाले. आज ते 'मन की बात' (PM Modi Man ki Baat) बोलत होते.

आयुष्मान भारत योजनेअंतर्गत राजेश कुमार प्रजापती या व्यक्तीवर उपचार झाले. त्याबाबत त्याने मोदींचे आभार मानले. तसेच त्यांना सत्तेत राहण्यासाठी शुभेच्छा दिल्या. त्यावेळी मोदी म्हणाले, ''मला सत्तेत राहण्यासाठी शुभेच्छा देऊ नका. मी आताही सत्तेत नाही आणि भविष्यात पण सत्तेत राहायची इच्छा नाही. कारण मला जनतेच्या सेवेत राहायचं आहे. आता देखील मी जनतेच्या सेवेत आहे. पंतप्रधान पद हे सत्ता म्हणून माझ्यासाठी महत्वाचं नाही. मी जनतेचा सेवक आहे.'' तसेच यावेळी त्यांनी आयुष्मान भारत योजनेचं महत्व सांगितलं. प्रत्येकाने आयुष्यमान भारत योजनेअंतर्गत कार्ड बनवायला पाहिजे. पैशामुळे उपचार मिळत नाहीत, असं व्हायला नको. कुटुंबातील सर्वांना कार्ड बनवायला सांगा. त्यामुळे खासगी रुग्णालयात देखील उपचार घेता येतील, असं मोदी म्हणाले.

स्वातंत्र्याच्या अमृतमहोत्सानिमित्त देशात ठिकठिकाणी अनेक कार्यक्रम सुरू असून त्याला लोकांचा चांगला प्रतिसाद मिळत आहे. या कार्यक्रमांबाबत मला अनेक प्रतिक्रिया येत आहेत, असंही मोदींनी सांगितलं. तसेच गेल्या काही दिवसांपूर्वी मध्य प्रदेशात जनजातीय गौरव सप्ताह साजरा करण्यात आला. त्याचा उल्लेख देखील त्यांनी 'मन की बात'मध्ये केला. तसेच कोरोना अजून गेलेला नाही. त्यामुळे जनतेनी काळजी घ्यावी असंही आवाहनही त्यांनी केलं.