नवी दिल्ली - पंतप्रधान नरेंद्र मोदी यांच्या हस्ते गुरुवारी मेजर ध्यानचंद राष्ट्रीय स्टेडियमवर राष्ट्रीय जनजाती महोत्सवच्या 'आदि महोत्सवा'चे उद्घाटन झाले. यावेळी आदिवासी समाजातर्फे सांस्कृतिक कार्यक्रम सादर करण्यात आला. कार्यक्रमाला संबोधित करताना पंतप्रधान मोदी म्हणाले की, आदिवासींच्या जीवनशैलीने मला खूप काही शिकवले आहे. (pm narendra modi inaugurates aadi mahotsav at major dhyan chand stadium )

देशाच्या कानाकोपऱ्यातील आदिवासी समाज आणि कुटुंबासोबत मी अनेक आठवडे घालवले आहेत. आदिवासींच्या परंपरा मी जवळून पाहिल्या आहेत, त्यांच्याकडून शिकलो आहे आणि जगलो आहे. आदिवासींच्या जीवनशैलीने मला देशाचा वारसा आणि परंपरांबद्दल बरेच काही शिकवले, असंही मोदी म्हणाले.

जागतिक व्यासपीठांच्या माध्यमातून भारत आदिवासी परंपरेला आपला वारसा आणि अभिमान म्हणून सादर करतो. भारत जगाला सांगतोय की, हवामान बदल आणि ग्लोबल वॉर्मिंग सारख्या आव्हानांवर उपाय हवे असतील तर आदिवासींची जीवनपरंपरा बघा, मार्ग सापडेल.

यावेळी पंतप्रधान मोदी म्हणाले की, अर्थसंकल्पात पारंपारिक कारागिरांसाठी पीएम-विश्वकर्मा योजना सुरू करण्याची घोषणा करण्यात आली आहे. पीएम-विश्वकर्मा अंतर्गत तुम्हाला आर्थिक मदत, कौशल्य प्रशिक्षण दिले जाईल. आपल्या उत्पादनाच्या विपणनासाठी सहकार्य केले जाईल. "