दिल्ली - पंतप्रधान नरेंद्र मोदी (PM Narendra Modi) यांच्या सुरक्षेतील त्रुटीचं प्रकरण आता सर्वोच्च न्यायालयात पोहोचलं आहे. गुरुवारी यासंबंधी एक याचिका दाखल करण्यात आली असून मोदींच्या सुरक्षेत झालेल्या हलगर्जीपणाची चौकशी करण्याची मागणी करण्यात आली आहे. यावर सुनावणी सर्वोच्च न्यायालयात शुक्रवारी होणार आहे. सरन्यायाधीश एन व्ही रमणा (NV Ramanna) यांनी याचिकाकर्त्याला सांगितले की, 'केंद्र आणि पंजाब (Punjab) सरकारला याची प्रत द्या.' दुसऱ्या बाजुला पंतप्रधानांच्या दौऱ्यात उद्भवलेल्या सुरक्षेच्या परिस्थितीची आता चौकशी करण्यासाठी पंजाब सरकारने उच्चस्तरीय चौकशी समिती स्थापन केली आहे. या समितीला तीन दिवसात अहवाल देण्यास सांगण्यात आलं आहे.

लॉयर्स व्हॉइस संघटनेकडून वरिष्ठ वकील मनिंदर सिंह यांनी पंतप्रधान नरेंद्र मोदींच्या सुरक्षेतील चुकीबद्दल सरन्यायाधीशांच्या खंडपीठासमोर प्रश्न उपस्थित केला. सिंह यांनी म्हटलं की, 'अशा घटना भविष्यात पुन्हा होऊ नयेत याची काळजी घ्यायला हवी.' तसंच भटिंडामध्ये पंतप्रधानांचा ताफा रोखण्यामागे सुरक्षेच्या नियामंचे उल्लंघन झालं, त्याची सखोल चौकशी करण्यात यावी अशी मागणी करण्यात आली आहे. तसंच पंतप्रधानांच्या दौऱ्यात पोलिस बंदोबस्ताशी संबंधित सर्व पुरावे भटिंडा जिल्हा न्यायाधीशांकडे सोपवण्यात यावेत यासाठी आदेश देण्याची मागणीही करण्यात आली.'

याचिकेत असंही म्हटलं आहे की, 'प्रोटोकॉलनुसार मुख्य सचिव आणि डीजीपी किंवा त्यांच्या समकक्ष अधिकाऱ्यांची कार या ताफ्यात असायला पाहिजे. मात्र त्यावेळी अशी अधिकाऱ्यांची कोणतीही कार तिथं असल्याची माहिती मिळाली नाही.' त्यावरून पंतप्रधानांपर्यंत पोहोचण्यासाठीची व्यवस्था करण्यात आली होती का असा प्रश्नही याचिकाकर्त्याने उपस्थित केला आहे.