लखनऊ ः (सीएए) विरोधात उत्तर प्रदेशात आंदोलनावेळी झालेल्या हिंसाचारप्रकरणी एका माजी पोलिस अधिकाऱ्याची भेट घेण्यासाठी जाताना पोलिसांनी मला अडवले. माझा गळा दाबला आणि मला ढकलून दिले, असा गंभीर आरोप काँग्रेस महासचिव प्रियांका गांधी यांनी शनिवारी उत्तर प्रदेश पोलिसांवर केला होता. पोलिसांनी मात्र हे आरोप फेटाळले आहेत.

सेवानिवृत्त आयपीएस अधिकारी असलेल्या एस. आर. दारापुरी यांची भेट घेण्यासाठी प्रियांका गांधी काँग्रेसच्या राज्य मुख्यालयातून निघाल्या होत्या. मात्र, लोहिया चौकात पोलिसांनी त्यांना अडवले. त्यानंतर पायी चालत जात असताना पोलिसांनी मला घेरले, आणि एका महिला पोलिस कर्मचारीने माझा गळा दाबला. मला धक्का दिला त्यामुळे मी जमिनीवर पडले. त्यानंतर मी एका कार्यकर्त्याच्या टू-व्हिलरवरून जात असताना पुन्हा माझी अडवणूक करण्यात आली, अशी माहिती प्रियांका गांधी यांनी एएनआयशी बोलताना दिली होती.

ताज्या बातम्यांसाठी डाऊनलोड करा ई-सकाळचे ऍप

प्रियांका पुढे म्हणाल्या की, 77 वर्षांचे माजी पोलिस अधिकारी दारापुरी यांनी शांततेच्या मार्गाने निदर्शने करावीत, अशा आशयाची फेसबुक पोस्ट प्रदर्शित केली होती. त्यांची पत्नी आजारी असतानाही पोलिसांनी त्यांना अटक केली. भाजप सरकारच्या धोरणांना विरोध करणाऱ्यांशी अशा प्रकारचे वर्तन केले जात आहे. मात्र, या दडपशाहीला आम्ही बळी पडणार नाही. आमचा सत्याग्रह आहे. मी उत्तर प्रदेशची प्रभारी असल्याने राज्यात कुठे जायचे याचा निर्णय भाजप सरकार घेऊ शकत नाही. भाजप भ्याडपणाने हल्ले करत आहे.

दारापुरी यांच्या कुटुंबियांना भेटल्यानंतर प्रियांकांनी माध्यमाशी संवाद साधला. त्या म्हणाल्या की, मी गाडीमधून शांततेने प्रवास करत होते. मग यामुळे कायदा आणि सुव्यवस्था कशी काय बिघडणार होती? माझ्यासोबत तीनपेक्षा जास्त लोक नव्हते. आणि मी याची कल्पना कोणालाही दिली नव्हती. मला अडविल्यानंतरही मी चालत गेले. तर मला थांबवण्याचा अधिकार यांना कुणी दिला? जर मला अटक करायची असेल तर करा.'

आणखी वाचा - मंत्रिमंडळ विस्तारातील संभाव्य नेत्यांची यादी फुटली?

यावर आता पुलिस क्षेत्राधिकारी अर्चना सिंह यांनी वरिष्ठांना दिलेल्या माहितीनुसार गांधी यांच्या दाैऱ्यावेळी त्यांना या ठिकाणी फ्लीट प्रभारीची ड्यूटी लावली होती. गांधी या गोखले मार्गाने काैल हाऊसला जाण्यासाठी निघाल्या होत्या, परंतू त्या ठरलेल्या मार्गाने जात नसल्याने तसेच त्या लोहीया रस्त्याने जाऊ लागल्याने आम्ही त्यांना असे का करता आहात याबाबत विचारले. तसेच याबाबत आम्ही पक्षाच्या इतर नेत्यांना  विचारले परंतू त्यांनी कोणीही याबाबत माहिती देण्यास नकार दिला. त्यानंतर गांधी या दुचाकीवरून उतरून पायी चालू लागल्या, गांधी यांचा गळा पकडला आणि खाली पाडले अशा काही भ्रामक बाबी सध्या सोशल मिडीयावर व्हायरल होत आहेत. या सगळ्या खोट्या आहेत.

ताज्या बातम्यांसाठी डाऊनलोड करा ई-सकाळचे ऍप