Prashant Kishor Suffers Injury During Political Rally: आगामी काळात बिहारमध्ये विधानसभा निवडणूक होणार आहे. या पार्श्वभूमीवर सर्वच राजकीय पक्षांनी कंबर कसली आहे. प्रत्येक पक्ष आपली ताकद वाढवण्यासाठी जास्तीत जास्त जनतेपर्यंत पोहचण्याचा प्रयत्न करत आहे. या शर्यतीत प्रशांत किशोर यांचा जनसुराज पक्षही मागे नाही. 

प्रशांत किशोर हे बिहारमध्ये पदयात्रा, रॅली करत आहेत. याच दरम्यान आज(शुक्रवार) त्यांना दुखापत झाल्याची बातमी समोर आली आहे. जनसुराज पक्षाचे संस्थापक प्रशांत किशोर यांना बिहारमधील आरा येथे एका रॅलीदरम्यान दुखापत झाली आहे. आरा येथे बिहार बदलाव रॅलीदरम्यान प्रशांत किशोर यांना छातीच्या बरगडीला दुखापत झाली. त्यानंतर प्रशांत किशोर भाषण न देताच उपचारासाठी पाटणा येथे परतले आहेत.

प्राप्त माहितीनुसार, आरा येथे रॅलीदरम्यान प्रशांत किशोर गाडीच्या दरवाज्याजवळ लटकून उभा होते आणि जनतेला भेटत होते. याचदरम्यान प्रचंड गर्दी होती आणि गर्दीने प्रशांत किशोर यांना ढकलले. यामुळे गाडीचा दरवाजा त्यांच्या छातीवर आदळला. यानंतर त्यांना छातीत प्रचंड वेदना होवू लागल्याने त्यांना तातडीने आरा येथील रुग्णालयात नेण्यात आले. मात्र डॉक्टरांनी त्यांना पाटणा येथे नेण्याचा सल्ला दिला. त्यानंतर प्रशांत किशोर यांना पाटणा येथे हलवण्यात आले असून, तेथील रुग्णालयात उपचार सुरू आहेत.

 प्रशांत किशोर बिहारमध्ये पदयात्रा करत आहेत. त्यांचा पक्ष जनसुराज यावेळी बिहार विधानसभा निवडणुकीत उमेदवार उतरवणार आहे. सध्या त्यांच्या जाहीर सभांमध्ये मोठ्या संख्येने लोकही जमत आहेत. प्रशांत किशोर आपल्या भाषणांमधून सातत्याने भाजप अन् मुख्यमंत्री नितीशकुमारांवर टीका करताना दिसत आहेत. तर काही दिवसांपूर्वीच प्रशांत किशोर यांनी माजी भाजप खासदार उदय सिंह यांना आपल्या जनसुराज पक्षाचे पहिले राष्ट्रीय अध्यक्ष म्हणून निवडले आहे.