नवी दिल्ली : सरकारने गुरुवारी असा दावा केलाय की, दिवसाला पाच लाख कोरोना रुग्ण हाताळण्याची क्षमता आरोग्य विभाग हाताळू शकतो, इतपत क्षमता तयार झाली आहे. पाच रुग्ण हाताळू शकण्याचा दावा आम्ही करतोय याचा अर्थ भविष्यात इतक्या मोठ्या संख्येने दैनंदिन रुग्णसंख्या आढळणार आहे, असं नाही.

कोरोना संक्रमणामध्ये पुन्हा वाढ होऊ लागली तर काय तयारी आहे, याबाबतची माहिती देताना नीती आयोगाचे सदस्य (आरोग्य) व्ही. के. पॉल यांनी पत्रकार परिषदेत म्हटलंय की, राज्यांकडून मिळालेल्या रिपोर्ट्सनुसार, कोरोना रुग्णांसाठी देशात सध्या 8.36 लाख बेड्स उपलब्ध आहेत. याशिवाय कोरोना रुग्णांच्या देखभालीसाठीची जवळपास 10 लाख (9,69,885) बेड्स उपलब्ध आहेत.

पॉल यांनी म्हटलंय की, याशिवाय अतिरिक्त 4.86 लाख ऑक्सिजन बेड्स आणि 1.35 लाख आयसीयू बेड्स उपलब्ध आहेत. सध्या कोरोना संक्रमितांची संख्या कमी आहे मात्र, आपली तयारी कमी नाहीये. दैनंदिन प्रकरणे हाताळण्यासाठी सध्या आपली तयारी मजबूत आहे. राज्य सरकार आणि खासगी क्षेत्रांसहित केंद्र सरकारच्या एकत्रित प्रयत्नामुळेच हे शक्य होतंय.

पुढे त्यांनी म्हटलंय की, आतापर्यंत 1,200 पीएसए ऑक्सिजन संयंत्र काम करत आहे आणि देशात सध्या असा एकही जिल्हा नाहीये जिथे याप्रकारचं संयंत्र उपलब्ध नसेल. ऑक्सिजनचा पुन्हा तुटवडा निर्माण होऊ नये यासाठी देशात जवळपास 4,000 पीएसए ऑक्सिजन संयंत्र स्थापन केले जाणार आहेत. आरोग्य मंत्रालयाचे सचिव लव अग्रवाल यांनी सांगितलंय की, कोरोना रुग्णांच्या संभाव्य वृद्धीला हाताळण्यासाठीच्या तयारीमध्ये आपण जराही कसर सोडत नाहीयोत.

दुसरीकडे, केंद्रीय आरोग्य मंत्रालयाने ऑक्टोबर, नोव्हेंबर आणि डिसेबंर या महिन्यांच्या दरम्यान लोकांना सतर्कतेचा इशारा दिला होता. या काळात असणाऱ्या सण-समारंभाच्या काळात रुग्णसंख्या पुन्हा एकदा वाढण्याची शक्यता वर्तवण्यात आली होती. लोकांनी गर्दीच्या ठिकाणी जाणं टाळावं तसेच हे सण डिजीटली साजरे करावेत, असा सल्ला देखील सरकारने दिला होता. सरकारने पुन्हा एकदा ही बाब स्पष्ट केलीय की, कोरोनाची दुसरी लाट अद्याप संपुष्टात आलेली नाहीये.