नवी दिल्ली : देशात कोरोना व्हायरसच्या प्रकरणांमध्ये झपाट्याने वाढ होत आहे. या प्रादुर्भावाची गती इतकी तीव्र आहे की, आता वाढत्या रुग्णसंख्येने पुन्हा एकदा लोकांची आणि प्रशासनाचीही झोप उडाली आहे. कोरोनाच्या या वाढत्या पार्श्वभूमीवर पंतप्रधान मोदींनी वरिष्ठ अधिकाऱ्यांसोबत उच्चस्तरिय बैठक आयोजित केली. या बैठकीत कोविड-19 शी संबंधित मुद्यांवर आणि लसीकरणाच्या अभियानावर चर्चा झाली. या बैठकीत कॅबिनेट सचिव, पंतप्रधानांचे प्रधान सचिव, आरोग्य सचिव आणि डॉक्टर विनोद पॉल समाविष्ट होते. असं म्हटलं जातंहोतं की कोरोनाच्या दुसऱ्या लाटेशी लढा देण्यासाठी पंतप्रधान मोदी या उच्चस्तरीय बैठकीनंतर काही मोठी घोषणा करु शकतात. 

आज देशभरात जवळपास 93 हजारहून अधिक रुग्ण सापडल्याने ही  बैठक महत्त्वपूर्ण मानली जात आहे. जर कोरोना प्रादुर्भावाची गती हीच राहिली तर एक-दोन दिवसांतच हा आकडा एक लाखांहून अधिक संख्या पार करु शकतो. 

हेही वाचा - देश हादरला! नक्षलवाद्यांशी लढताना 22 जवान शहीद

गेल्या 24 तासांत 93 हजारांगून अधिक रुग्ण
गेल्या 24 तासांत रेकॉर्डतोड अशा 93 हजार नव्या रुग्णांची भर पडली आहे. तर कोरोनाच्या संक्रमणामुळे तब्बल 500 हून अधिक रुग्णांचा जीव गेला आहे. एका दिवसांत इतक्या मोठ्या संख्येने रुग्ण मिळण्याची परिस्थिती सप्टेंबर महिन्यात होती. गेल्या वर्षी 19 सप्टेंबर रोजी 92,574 नवे रुग्ण सापडले होते. 

सात लाखाच्या जवळ नवे ऍक्टीव्ह रुग्ण
आरोग्य मंत्रालयाने जाहीर केलेल्या नव्या आकडेवारीनुसार, देशात ऍक्टीव्ह रुग्णांची संख्या मोठ्या प्रमाणावर वाढत आहे. गेल्या 24 तासांत 60,048 कोरोना रुग्ण बरे होऊन आपल्या घरी पोहोचले आहेत. यासोबतच देशात आतापर्यंत 1,16,29,289 रुग्ण  बरे होऊन घरी गेले आहेत. सध्या देशात ऍक्टीव्ह रुग्णांची संख्या वाढून ती 6,91,597 वर पोहोचली आहे.