नवी दिल्ली : टोकियो ऑलिम्पिकमधील भारताची कामगिरी अद्यापतरी जेमतेमच राहिली आहे. ११ दिवसांनंतर भारताला फक्त दोनच पदके मिळाली आहेत. यामध्ये वेटलिफ्टर मीराबाई चानू यांच्या रजत पदकाचा तर बॅडमिंटनपट्टू पीवी सिंधू यांच्या कांस्य पदकाचा समावेश आहे. भारतीय पुरुष हॉकी संघ सेमी फायनलला पोहोचला होता. मात्र, संघाला बेल्जियमकडून पराभवाचा धक्का बसला. हा सामना भारताचे पंतप्रधान नरेंद्र मोदी यांनीही पाहिला. पराभव आणि विजय हे जीवनाचाच भाग आहे. तुम्ही सर्वश्रेष्ठ खेळी केली, अशी कौतुकाची थापही मोदी यांनी दिली आहे. मात्र, तुमची 'पनौती' लागली असल्याची टीका नेटकऱ्यांनी पंतप्रधान मोदींवर केलेली पहायला मिळत आहे. सध्या #Panauti हा ट्रेंड टॉपमध्ये आहे. सध्यातरी आणखी काही पदके मिळतील, या आशेवर भारतीय खेळाडूंचा चमू आहे.

दुसरीकडे भारताचे पंतप्रधान नरेंद्र मोदी १५ ऑगस्ट रोजी भारतीय ऑलिम्पिक दलाला एक विशेष अतिथीच्या स्वरुपात लाल किल्ल्यावर आमंत्रित करणार आहेत. तसेच ते त्या सर्व खेळाडूंशी वैयक्तिकरित्या भेटून बातचित देखील करणार आहेत. तसेच त्यांना आपल्या निवासस्थानी देखील बोलावणार आहेत. सध्या टोकियो ऑलिम्पिकमध्ये भारतातील खेळाडूंचे सर्वांत मोठे दल पोहोचले आहे. या चमूमध्ये १२७ खेळाडू आहेत. वेगवेगळ्या खेळांमध्ये ते देशाचं प्रतिनिधित्व करत आहेत.