नवी दिल्ली : शिक्षण मंत्रालयाने पंतप्रधान नरेंद्र मोदी यांच्या विद्यार्थी, पालक आणि शिक्षक यांच्याशी संवाद कार्यक्रम "परीक्षा पे चर्चा" या कार्यक्रमावरील खर्चात सुमारे ६ टक्क्यांनी वाढ केली आहे. पुढील वर्षी ९ कोटी रुपये करण्याचा प्रस्ताव ठेवण्यात आला आहे. ही माहिती शिक्षण मंत्रालयाच्या शालेय शिक्षण आणि साक्षरता विभागाच्या प्रकल्प मंजुरी मंडळाच्या बैठकीच्या इतिवृत्त दस्तऐवजातून प्राप्त झाली आहे. पीटीआयने याबाबत वृत्त दिले आहे. 

प्रकल्प मंजुरी मंडळाच्या दस्तऐवजानुसार, परीक्षा पे चर्चा - २०२३ च्या कार्यक्रमाचे २७ जानेवारीला आयोजन करण्यात आले होते. यावर जवळपास ८.५० करोड रुपये खर्च करण्यात आले होते. 

केंद्रीय शिक्षण राज्यमंत्री अन्नपूर्णा देवी यांनी ६ फेब्रुवारी रोजी लोकसभेत एका प्रश्नाच्या लेखी उत्तरात सांगितले की, पंतप्रधान नरेंद्र मोदी यांच्या संवाद कार्यक्रमात २०१८ मध्ये ३.६७ कोटी रुपये, २०१९ मध्ये ४.९३ कोटी रुपये खर्च करण्यात आले. २०२० मध्ये ५.६९ कोटी रुपये, २०२१ मध्ये ६ कोटी रुपये आणि २०२२ मध्ये ८.६१ कोटी रुपये खर्च करण्यात आले. २०१८ मध्ये परीक्षा पे चर्चा कार्यक्रमास सुरूवात झाली होती. आतापर्यंत या कार्यक्रमाचे सहावेळा आयोजन करण्यात आले आहे. 

दरम्यान, प्रकल्प मंजुरी मंडळाच्या माहितीनुसार २०२४ मध्ये होणाऱ्या पंतप्रधान नरेंद्र मोदी यांच्या परीक्षा पे चर्चा या कार्यक्रमात जवळपास ९ करोड रुपये खर्च करण्याचा प्रस्ताव केला गेला आहे. यामध्ये अ‍ॅडव्हान्स म्हणून ३.६० कोटी रुपये दिले जाऊ शकतात. उर्वरित रक्कम कार्यक्रमाच्या आयोजनानंतर देण्यात येणार आहे. २०२३ च्या तुलनेत २०२४ मध्ये या कार्यक्रमाच्या खर्चात ६ टक्के वाढ करण्यात आली आहे.