पंजाबमध्ये काँग्रेसला आणखी एक धक्का बसला असून, काही दिवसांपूर्वीच पंजाबच्या कॅबिनेट मंत्री म्हणून शपथ घेतलेल्या रझिया सुल्ताना यांनी नवज्योतसिंग सिद्धू यांच्या समर्थनात राजीनामा दिला. काही वेळापुर्वीच काँग्रेस प्रदेश अध्यक्ष नवज्योत सिंग सिद्धू यांनी आपल्या प्रदेश अध्यक्ष पदाचा राजीनामा दिला आहे. सिद्धू (Navjot Singh Sidhu) यांनी राजीनामा दिल्याने काँग्रेससाठी हा एक मोठा धक्का असल्याचे म्हटलं जात होतं. त्यांच्या राजीनाम्यानंतर पंजाबमध्ये आता राजीनाम्याचं सत्र सुरू झाल्याचं दिसतं आहे. काही वेळापुर्वीच काँग्रेस नेते गुलझार इंदर चहल आणि कॅबीनेट मंत्री रझिया सुल्तान यांनी राजीनामा दिला होता. त्यानंतर लगेचच पंजाब काँग्रेसचे सरचिटणीस योगिंदर धिंग्रा यांनी राजीनामा दिला आहे.

"सिद्धू साहेब तत्त्व पाळणारा माणूस आहे. ते पंजाब आणि पंजाबियत या साठी लढता आहेत" असं मत त्यांनी यावेळी व्यक्त केलं.

योगिंदर धिंग्रा यांनी पंजाब काँग्रेसच्या सरचिटणीस पदाचा राजीनामा दिला. नवज्योतसिंग सिद्धू यांच्या समर्थनात राजीनामा देत असल्याचे त्यांनी यावेळी सांगितले. सुल्ताना आणि राज्य पक्षाचे कोषाध्यक्ष गुलजार इंदर चहल यांच्या राजीनाम्यानंतर दिलेला धिंग्रा तिसरा काँग्रेस नेता आहे.