पुणे : पंजाब नॅशनल बँकेने (Punjab National Bank) १५ जानेवारीपासून ग्राहकांना सेवाशुल्कात २५ ते ५० टक्के वाढ केली आहे. तसेच, मोठ्या शहरांमध्ये खात्यात किमान शिल्लक रक्कम आत्ता दुप्पट ठेवण्याचे बंधन घातले आहे. त्यामुळे पुणे-मुंबईसारख्या शहरात खात्यात किमान दहा हजार रुपये ठेवणे आवश्यक आहे. तसे न केल्यास सहाशे रुपयांचा दंड ठोठावला जाणार आहे. (Punjab National Bank New Rule)

विवेक वेलणकर यांनी बॅंकेकडून माहिती अधिकारात माहिती घेतली. त्यानुसार, २०१६-१७ ते २०२०-२१ या फक्त पाच वर्षांत पंजाब नॅशनल बँकेने शंभर कोटींच्यावर कर्ज थकबाकी असणाऱ्या १४८ थकबाकीदारांची ४६ हजार १२५ कोटी रुपयांची कर्जे निर्लेखित केली आहेत. त्यापैकी चार हजार ५१६ (सुमारे दहा टक्के) कोटींची वसुली बॅंक करू शकली आहे.

पंजाब नॅशनल बँकेचे हे किमान शिल्लक परिपत्रक रिझर्व्ह बँकेने २०१४ साली काढलेल्या परिपत्रकाच्या पूर्णपणे विरोधात असून, बेकायदेशीर आहे. रिझर्व्ह बॅंकेच्या परिपत्रकानुसार बॅंकेला खात्यात किमान शिल्लक नसल्यास निश्चित दंड लावता येत नाही. तर, दंडाच्या रकमेचे स्लॅब करावे लागतात आणि किमान शिलकीच्या रकमेच्या नियमापेक्षा जितकी रक्कम कमी पडली त्या प्रमाणातच दंड आकारता येतो. त्यासाठी ग्राहकाला खात्यात शिल्लक कमी झाल्याचे कळविणे गरजेचे आहे, असे वेलणकर यांनी निवेदनात नमूद केले आहे.

मोठ्या कर्जदारांची थकीत कर्जे वसूल करण्यात अपयश आलेली बॅंक आता ग्राहकांच्या खिशात हात घालून दात कोरून पोट भरायला बघते आहे. बेकायदेशीर परिपत्रक काढून ग्राहकांना लुटू पाहणाऱ्या पंजाब नॅशनल बँकेला ग्राहकांनी संघटितपणे धडा शिकवण्याची वेळ आली आहे. अन्यथा उर्वरित राष्ट्रीयकृत बॅंका पंजाब नॅशनल बँकेचा कित्ता गिरविण्याची शक्यता आहे.

- विवेक वेलणकर, अध्यक्ष, सजग नागरिक मंच