Siddhu Moosewala Shooters New Video : लोकप्रिय पंजाबी गायक, रॅपर आणि काँग्रेस नेता सिध्दू मूसेवाला यांची 29 मे रोजी गोळ्या घालून हत्या करण्यात आली होती. सिध्दू मूसेवाला हत्येशी संबंधित आणखी एक व्हिडिओ आता समोर आलाय. मूसेवालाची हत्या केल्यानंतर मारेकरी गाणं गात सेलिब्रेशन करतानाचा हा व्हिडिओ आहे.

या व्हिडिओत मूसवालाचे मारेकरी खूप सेलिब्रेशन करताना दिसताहेत. तसंच मस्तीत हे लोक हवेत शस्त्रेही फिरवत आहेत. एकीकडं पोलीस या हत्येशी संबंधित लोकांना अटक करत असतानाच या हत्येनंतरचा व्हिडिओ आरोपींचं मनोबल वाढवत आहे. हा व्हिडिओ मूसवालाच्या हत्येनंतरचा आहे. या हत्येनंतर एकीकडं पोलीस आरोपींचा शोध घेत होते, तर दुसरीकडं हे आरोपी पोलिसांच्या भीतीची पर्वा न करता व्हिडिओ बनवत होते.

मुसेवाला हत्येप्रकरणी दिल्ली पोलिसांनी सोमवारी आणखी दोघांना अटक केलीय. अंकित आणि सचिन भिवानी अशी या अटक करण्यात आलेल्या दोन्ही आरोपींची नावं आहेत. दरम्यान, व्हिडिओमध्ये आरोपी सिध्दू मुसेवालाला मारल्यानंतर मजा करत होता आणि पंजाबी गाण्यांवर हवेत हात फिरवत होता. त्यापैकी सोमवारी अटक करण्यात आलेले अंकित आणि प्रियवत हे देखील दिसत आहेत. पोलीस जेव्हा या शूटर्सचा शोध घेत होते, तेव्हा हे आरोपी एका ठिकाणाहून दुसऱ्या ठिकाणी फरार होत होते. या लोकांनी जवळपास 35 ते 36 ठिकाणं बदलल्याचं दिल्ली पोलिसांनी सांगितलं.