नवी दिल्ली : पंतप्रधान मोदींनी सर्व राज्यांच्या मुख्यमंत्र्यांसोबत कोरोना आढावा बैठक घेतली. पण, या बैठकीत पेट्रोल-डिझेल दरवाढीचा (Petrol Diesel Rate Hike) मुद्दा उपस्थित केला. बिगरभाजपशासित राज्यांवर टीका केली. त्यावरून आता राहुल गांधी (Rahul Gandhi) यांनी पंतप्रधान मोदींवर (PM Modi) टीका केली आहे. मोदींचा संघवाद हा सहकारी नसून जबरदस्तीचा आहे, असं राहुल गांधी म्हणाले.

इंधन दरवाढ, कोळशाची टंचाई, ऑक्सिजनची टंचाई या सर्व गोष्टींसाठी राज्यांना दोष द्यायचा. केंद्र सरकार इंधनावरील ६८ टक्के कर घेतेय. तरीही पंतप्रधान मोदी जबाबदारी झटकतात. मोदींचा संघवाद हा सहकारी नसून जबरदस्तीचा आहे, असं राहुल गांधी म्हणाले.

नेमकं काय घडलं? -

देशात कोरोना रुग्णांची संख्या वाढत आहे. त्यामुळे पंतप्रधान मोदींनी कोरोनाचा आढावा घेण्यासाठी सर्व राज्यांच्या मुख्यमंत्र्यांसोबत चर्चा केली. पण, मध्येच इंधनदरवाढीचा मुद्दा उपस्थित केला. केंद्राने पेट्रोल-डिझेलवरील कर कमी करून जनतेला दिलासा देण्याचा प्रयत्न केला. तसेच भाजपचं सरकार असलेल्या राज्यांनी देखील कर कमी करून जनतेला दिलासा दिला. पण, महाराष्ट्र, केरळ, पश्चिम बंगाल यांसारख्या राज्यांनी इंधनावरील कर कमी केला नाही. त्यामुळे पेट्रोल-डिझेल इतकं महाग आहे, असं पंतप्रधान मोदी म्हणाले.

दरम्यान, मोदींनी इंधनदरवाढीची जबाबदारी राज्यावर ढकलल्याची टीका झाली. तसेच मोदी इंधनदरवाढ कमी करण्यात अपयशी ठरले त्यामुळे राज्यांना दोष दिला जात आहे, असा आरोपही विरोधकांनी त्यांच्यावर केला. पंतप्रधान मोदींचं भाषण एकतर्फी होतं, असं पश्चिम बंगालच्या मुख्यमंत्री ममता बॅनर्जी म्हणाल्या. तसेच महाराष्ट्राचे मुख्यमंत्री उद्धव ठाकरे यांनी देखील जोरदार निशाणा साधला. केंद्राकडे आमचे पैसे थकले असून वारंवार मागणी करूनही पैसे मिळत नसल्याचं ते म्हणाले.