नवी दिल्ली : माजी पंतप्रधान राजीव गांधी हत्या प्रकरणातील दोषींपैकी एक एजी पेरारिवलनची तब्बल 31 वर्षांनंतर तुरुंगातून सुटका होणार आहे, सर्वोच्च न्यायालयाच्या आदेशानंतर त्याची सुटका केली जाणार आहे. या संपूर्ण कायदेशीर लढाईत आपल्याला गांधी यांच्या हत्येच्या कटाची कल्पना नसल्याचे पेरारिवलन सांगत होता. पेरारिवलन याला राजीव गांधी यांच्या हत्येप्रकरणी वयाच्या 19 वर्षी अटक करण्यात आली होती. दरम्यान, तुरुंगात असताना पेरारिवलन याने तुरुंगातून शिक्षण पूर्ण केले. यातील एका परिक्षेमध्ये त्याने सुवर्णपदकदेखील पटकावले होते. (Rajiv Gandhi convict AG Perarivalan)

राजीव गांधींच्या हत्येमध्ये हात असल्याचा आरोप

पेरारिवलन याला माजी पंतप्रधान राजीव गांधी यांच्या हत्येत हात असल्याच्या आरोपानंतर न्यायालयाने त्याला दोषी ठरवत जन्मठेपेची शिक्षा ठोठावली होती. पेरारिवलन याला 11 जून 1991 रोजी त्याला राहत्या घरातून अटक करण्यात आली होती. पेरारिवलनने पेराम्बुदूरच्या जाहीर सभेत राजीव गांधी यांची हत्या झाली त्यामध्ये वापरलेल्या बॅटरीची व्यवस्था केली होती.

पेरारिवलन अभियांत्रिकीचा हुशार विद्यार्थी

पेरारिवलन हा एक अभियांत्रिकीचा हुशार विद्यार्थी होता. अटकेनंतर त्याने तुरुंगात पुढील शिक्षण घेतले. यामध्ये त्याने एका परीक्षेत सुवर्णपदक पटकावला होते. पेरारिवलनला अरिवू नावाने देखील ओळखले जाते.अरिवूचे वडील एका शाळेत शिक्षक होते.