नवी दिल्ली - राम मंदिराच्या भूमीपूजनाचा मुहुर्त ठरल्यानंतर आता मंदिराचं नवं डिझाइन समोर आलं आहे. थ्रीडी डिझाइनमध्ये राम मंदिर आणखी भव्य दिसत आहे. यात मंदिराचे शिखर उंच असल्याचंही दिसतं. मंदिराचे मुख्य आर्किटेक्ट निखिल सोमपुरा यांनी मंदिराचे डिझाइन केलं आहे. 

राम मंदिराचे पहिले डिझाइन 1985-86 मध्ये तयार करण्यात आलं होतं. त्यावेळी भाविकांची गर्दी लक्षात घेऊन डिझाइन तयार केलं होतं. मात्र आता संभाव्य गर्दीचा विचार करता डिझाइनमध्ये बदल करण्यात आला आहे. यात मंदिराच्या आकारात बदल करण्यात आला. मंदिराची लांबी, उंची वाढवण्यात आली आहे. 

हे वाचा - राष्ट्रपती राजवटीसाठी भाजपची खेळी; बिहारमधील निवडणुकीवर कोरोनामुळे टांगती तलवार

याआधी तयार केलेल्या डिझाइनमध्ये राम मंदिर दोन मजली होतं. नव्या डिझाइनमध्ये ते तीन मजली करण्यात आलं आहे. याची उंची 161 फूट, लांबी 360 फूट तर तर रुंदी 235 फूट असणार आहे. मंदिराचा मूळ आराखडा तसाच असणार आहे. आणखी तीन शिखरे वाढवण्यात आली आहेत. बाजुला दोन आणि पुढे एक अशी शिखरे असणार आहेत. यामुळे मंदिराच्या शिखरांची एकूण संख्या पाच इतकी होईल. 

राम मंदिराची आधीची उंची 128 फूट होती. आता ती 161 फूट असणार आहे. तीन मजली मंदिरात 318 खांब असतील. प्रत्येक मजल्यावर 106 खांब असणार आहेत. राम ललाचे मंदिर जमीनीपासून 17 फूट उंचीवर असेल. दुसऱ्या मजल्यावर राम दरबार असणार आहे. जवळपास 69 एकर जमिनीवर पाच शिखरांचे मंदिर असेल. 

हे वाचा - धक्कादायक ! भाजपच्या विधानपरिषद आमदाराचा कोरोनामुळे मृत्यू

राम मंदिरात भाविक मोठ्या प्रमाणावर दर्शनासाठी येतात. तेव्हा त्यांना अडचण होऊ नये यासाठी मंदिराच्या डिझाइनमध्ये बदल करण्यात आला. राम मंदिराच्या नव्या डिझाइनमध्ये एक मंडप उभारण्याचाही प्रस्ताव आहे. ज्यामध्ये एकाचवेळी पन्नास हजार लोक बसू शकतील.