मंडणगड: आपणा सर्वांना माझा नमस्कार... राष्ट्रपती डॉ.रामनाथ कोविंद यांनी मराठीतून भाषणाला सुरुवात करताच सभागृहात टाळ्यांचा कडकडाट झाला. आज मी संविधानाचे निर्माते भारतरत्न डॉ. बाबासाहेब आंबेडकर यांच्या स्फुर्तीभूमी आंबडवेचे (Ambadawe)दर्शन घेतले, मी अत्यंत भावूक झालो आहे. डॉ. बाबासाहेब आंबेडकर (Dr. Babasaheb Ambedkar) यांच्या समोर मी नतमस्तक झालो. माता रमाई व बाबासाहेबांचे वडील सुभेदार रामजी सकपाळ यांना फुले वाहिली.

आपल्या भाषणात राष्ट्रपती डॉ. कोविंद म्हणाले कि, रत्नागिरी जिल्हा हा नररत्नांची खाण असणारा जिल्हा आहे. या जिल्ह्याने देशाला अनेक रत्ने दिली आहेत. त्यापैकी सर्वात महत्वाचे रत्न म्हणजे भारतरत्न डॉ. बाबासाहेब आंबेडकर हे आहेत. तसेच रत्नागिरी जिल्ह्याचे, मंडणगड (Mandangad)तालुक्याचे निसर्ग सौंदर्य अप्रतिम आहे.

रत्नागिरी हापूस आंब्याची चव व गोडवा केवळ आपल्या देशातच नव्हे तर परदेशातही टिकून आहे व प्रसिद्ध आहे. हाच हापूसच गोडवा संपूर्ण देशातील लोकांच्या जिभेवर आहे व त्याचप्रमाणे येथील माणसं देखील तितकीच गोड व आदर्शवत आहेत. त्यांच्यातील हा गोडवा संपूर्ण देशभरात निर्माण व्हावा अशी अपेक्षा राष्ट्रपती यांनी आपल्या मनोगतामध्ये व्यक्त करताना रत्नागिरीकरांची प्रशंसा केली.