मुंबई : रिझर्व्ह बँकेने निर्बंध घातलेल्या पंजाब अँड महाराष्ट्र को-ऑपरेटिव्ह बँकेच्या ग्राहकांना गुरूवारी (ता.3) मोठा दिलासा मिळाला आहे. पीएमसी बँकेतून पैसे काढण्याची मर्यादा 10 हजारांवरून 25 हजार रुपयांपर्यंत वाढवण्यात आल्याचे रिझर्व्ह बँकेने गुरूवारी जाहीर केले.
या निर्णयाने बँकेच्या लाखो खातेदारांना फायदा होण्याची शक्यता आहे. आठवडाभरात दुसऱ्यांदा रिझर्व्ह बँकेने पैसे काढण्याची मर्यादा वाढवली आहे. पीएमसी बँकेवर प्रशासकीय देखरेखीसाठी रिझर्व्ह बँकेने तीन सदस्यांची नियुक्ती केली आहे.
बँकेचा आर्थिक आढावा घेतल्यानंतर खातेदार आणि ठेवीदारांचा त्रास कमी करण्याच्यादृष्टीने पैसे काढण्याची मर्यादा 25 हजारांपर्यंत वाढवण्यात आल्याचे रिझर्व्ह बँकेने प्रसिद्धी पत्रकात म्हटले आहे.
दरम्यान, गेल्या आठवडाभरापासून राज्यभरात 'पीएमसी'च्या ठेवीदार आणि खातेदारांकडून आंदोलने केली जात आहेत. मुंबईत रिझर्व्ह बँकेच्या कार्यालयासमोरदेखील खातेदारांनी आंदोलन केले होते. त्यामुळे रिझर्व्ह बँकेवर दबाव वाढल्याने पैसे काढण्याची मर्यादा वाढवण्याचा निर्णय घेण्यात आल्याचे जाणकारांचे म्हणणे आहे.
बुडीत कर्जांसंदर्भातील अनियमिततेमुळे रिझर्व्ह बँकेने गेल्या आठवड्याच्या सुरूवातीला पीएमसी बँकेवर सहा महिन्यांसाठी निर्बंध घातले आहेत. यानंतर ग्राहकांना खात्यातून एक हजार रुपये काढण्याची परवानगी देण्यात आली होती. मात्र त्यात 10 हजारांपर्यंत वाढ केली होती.
पंजाब अँड महाराष्ट्र को-ऑपरेटिव्ह बँकेच्या खातेदार आणि ठेवीदारांसाठी सोमवारी (ता.30) रिजर्व्ह बँकेने टोल फ्री क्रमांक सुरू केला. ग्राहकांना त्यांच्या तक्रारी 1800223993 या क्रमांकावर नोंदवता येतील. त्याचबरोबर www.pmcbank.com या संकेतस्थळावर ग्राहक तक्रार करू शकतात, असे आरबीआयने म्हटले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.