नवी दिल्ली- कोरोना महामारीची सुरुवात होऊन एक वर्ष झाला आहे. तरीही विषाणूने हाहाकार सुरुच ठेवला आहे. देशात कोरोनाबाधित रुग्णांची संख्या पुन्हा वाढू लागली आहे. देशात कोरोनाची दुसरी लाट आल्याची शक्यता व्यक्त केली जात आहे. महाराष्ट्र राज्यात कोरोनाची स्थिती अधिक भयानक बनताना दिसत आहे. आरोग्यमंत्री राजेश टोपे यांनी राज्यात कोरोनाची दुसरी लाट आली असल्याचं म्हटलं आहे. त्यातच देशात कोरोना लसीकरणाने वेग घेतला आहे. विषाणूवर मात करण्यासाठी मोठ्या प्रमाणात लसीकरण होणं गरजेचं असल्याचं वैज्ञानिकांचं मत आहे. देशात शुक्रवारी 20.53 लाख लोकांना कोरोनाची लस देण्यात आली आहे. आतापर्यंत ही सर्वात मोठी आकडेवारी असल्याने लसीकरणाचा हा एका दिवसातील विक्रम आहे. सर्वाधिक 3.3 लाख लशीचे डोस उत्तर प्रदेशमध्ये देण्यात आले आहेत. आतापर्यंत 74 टक्के डोस उत्तर प्रदेश, महाराष्ट्र. पश्चिम बंगाल, राजस्थान, गुजरात, बिहार, केरळ आणि कर्नाटक या राज्यांना देण्यात आले आहेत. 

शनिवारपर्यंत देशातील 2.91 कोटी लोकांना कोरोनावरील लस देण्यात आली आहे. यात 78.6 लाखपेक्षा अधिक लोक 60 वर्षे वयावरील आणि 13.8 लाख लोक 45 ते 59 वर्षे वयावरील आहेत. देशात लसीकरण 16 जानेवारीला सुरु करण्यात आले होते. पहिल्या टप्प्यात आरोग्य कर्मचारी आणि फ्रंटलाईन वर्कर्संना कोरोनाची लस देण्यात आली होती. 1 मार्चपासून लसीकरणाचा दुसरा टप्पा सुरु करण्यात आला. सध्या देशात भारत बायोटेकची कोवॅक्सिन आणि सीरम इन्स्टिट्यूटची कोविशिल्ड लस नागरिकांना दिली जात आहे. देशात आणखी सहा लशी उपलब्ध होणार असल्याची माहिती आरोग्यमंत्री हर्षवर्धन यांनी दिली. 

स्वस्त इंधन अन्‌ पेट्रोलचा वादा; द्रमुकच्या जाहीरनाम्यात आकर्षक घोषणा

कोरोना लसीकरणाचा वेग वाढवण्याची गरज

कोरोनाबाधित रुग्णांचा आकडा वाढत असल्याने चिंता व्यक्त केली जात आहे. त्यामुळे लसीकरणाचा वेग वाढवण्यासाठी केंद्र सरकार प्रयत्न करत आहे. कोरोना लसीकरणासाठी खासगी हॉस्पिटल्सनाही परवानगी देण्यात आली आहे. तसेच 24 तास लसीकरण सेवा पुरवण्याचे प्रयत्न केले जाणार आहेत. लवकरच तरुणांना कोरोनावरील लस दिली जाण्याची घोषणा होण्याची शक्यता आहे. लहान मुलांच्या लसीकरणासाठी जून महिना उजाडण्याची शक्यता आहे.