रोहतक : हरियाणातील डेरा सच्चा सौदा प्रमुख राम रहीमला (Ram Rahim) पॅरोल देण्यात आलाय. रोहतकच्या सुनारिया तुरुंगात (Sunaria Jail Rohtak) बंद असलेल्या गुरमीत राम रहीमला जेल विभागानं पॅरोल दिलाय. शुक्रवारी सकाळी राम रहीमला तुरुंगाबाहेर आणण्यात आलं असून, राम रहीमला कडेकोट बंदोबस्तात तुरुंगातून बाहेर काढण्यात आलंय. (Gurmeet Ram Rahim News)

पॅरोलच्या कालावधीत राम रहीम यूपीतील बागपत आश्रमात (Baghpat Ashram) राहणार असल्याचं सांगण्यात येतंय. बागपतच्या बरनावा गावात हा आश्रम असून राम रहीमचा कॅम्प (डेरा) आहे. हरियाणा सरकारनं राम रहीमला एका महिन्यासाठी पॅरोल दिलाय. याआधी हरियाणा सरकारनं (Haryana Government) फेब्रुवारीमध्ये राम रहीमला 21 दिवसांचा पॅरोल मंजूर केला होता. यादरम्यान सरकारनं राम रहीमच्या जीवाला धोका असल्याचं सांगत त्याला Z+ सुरक्षा प्रदान केली होती. सुट्टीच्या काळात राम रहीम बहुतेक वेळ त्याच्या गुरुग्राम आश्रमात राहिलाय.

राम रहीमला 25 ऑगस्ट 2017 रोजी विशेष सीबीआय न्यायालयानं (CBI Court) दोन साध्वींचा लैंगिक छळ केल्याप्रकरणी शिक्षा सुनावली होती. पंचकुलातील हिंसाचारानंतर राम रहीमची रवानगी सुनारिया तुरुंगात करण्यात आली होती. तेव्हापासून तो तुरुंगात आहे. यानंतर पत्रकार रामचंद्र छत्रपती हत्या प्रकरणातही त्याला शिक्षा झाली होती.