हैदराबाद : काँग्रेसनं नवा अध्यक्ष निवडण्यासंबंधी विस्तृत कार्यक्रमाची रविवारी घोषणा केली. त्यानुसार 24 सप्टेंबरपासून अर्ज दाखल करण्याची प्रक्रिया सुरू होईल. तर, एकापेक्षा अधिक उमेदवार असल्यास 17 ऑक्टोबरला निवडणूक होणार आहे. याच पार्श्वभूमीवर केंद्रीय मंत्री आणि आरपीआयचे (RPI) अध्यक्ष रामदास आठवले (Ramdas Athawale) यांनी मोठं वक्तव्य केलंय.

रामदास आठवले म्हणाले, राहुल गांधींनी (Rahul Gandhi) काँग्रेसचे अध्यक्ष होणं युपीएसाठी चांगलं होईल. मात्र, काँग्रेस अध्यक्ष कोण होणार हे अद्याप स्पष्ट झालेलं नाहीय. जो कोणी अध्यक्ष होईल आणि आपल्या पक्षाचा विस्तार करेल त्याला आमच्या शुभेच्छा राहतील. वरिष्ठ व्यक्तीला संधी देणं अधिक चांगलं राहील, असं त्यांनी स्पष्ट केलं.

यावेळी आठवलेंनी नुकतेच काँग्रेस (Congress) सोडलेल्या गुलाम नबी आझाद (Ghulam Nabi Azad) यांनी देखील खुली ऑफर दिलीय. ते म्हणाले, गुलाम नबी आझाद यांनी सत्ताधारी एनडीएसोबत जवळीक साधून काम करावं, अशी ऑफर आठवलेंनी आझादांना दिलीय. गुलाम नबी आझाद यांना काँग्रेस सोडल्यानंतर पूर्ण स्वातंत्र्य मिळालंय. जम्मू-काश्मीरमध्ये काँग्रेस पक्ष गुलाम नबी आझाद यांच्यासोबत जाणार असल्याचं आठवलेंनी सोमवारी स्पष्ट केलं.

गुलाम नबी आझाद यांना आवाहन करून त्यांनी एनडीएमध्ये सामील होण्यास सांगितलंय. देश आणि जम्मू-काश्मीरच्या विकासासाठी त्यांनी एनडीएसोबत यावं. जर तुम्हाला वेगळा पक्ष काढायचा असेल, तर ती चांगली गोष्ट असून तुम्हाला तसं करण्याचं पूर्ण स्वातंत्र्य आहे, असंही आठवले म्हणाले. पण, तुमच्या पक्षाला एनडीएसोबतच यावं लागेल, असंही त्यांनी यावेळी स्पष्ट केलं.