Veer Savarkar Row- विनायक सावरकर यांच्यावरून काँग्रेस आणि शिवसेना यांच्यात झालेला वाद आता संपुष्टात आला आहे. सावरकर हे आमचे आदर्श असून त्यांचा अपमान खपवून घेतला जाणार नाही, असा इशारा शिवसेनेचे नेते उद्धव ठाकरे यांनी दिला होता.

शिवसेनेने बुधवारी हा प्रश्न सुटला असून भाजपविरोधातील लढाईत विरोधी पक्षांसोबत खंबीरपणे उभे असल्याचे म्हटले आहे. उद्धव ठाकरे यांचे निकटवर्तीय असलेले खासदार संजय राऊत इंडियन एक्सप्रेसशी बोलताना म्हणाले की, 'आमच्यासाठी हा विषय संपला आहे. हे प्रकरण मिटले आहे. याबाबत मी राहुल गांधी यांच्याशी बोललो आहे. " याबाबत जनसत्ताने वृत्त दिलं आहे.

संजय राऊत म्हणाले की, आम्ही दोन दिवसांपूर्वी सावरकरांबाबतचा मुद्दा उपस्थित केला होता. मल्लिकार्जुन खर्गे यांच्या घरी झालेल्या बैठकीला आम्ही उपस्थित नव्हतो. पण महाराष्ट्रात तसेच देशात विरोधकांची एकजूट आहे आणि राहील.

आम्ही मांडलेल्या आक्षेपाचा परिणाम स्पष्ट झाला आहे. आम्ही आज विरोधकांच्या बैठकीला उपस्थित राहू आणि संसदेतील आंदोलनातही सहभागी होऊ.

राहुल गांधी यांनी हा मुद्दा पुन्हा उपस्थित केल्यास पक्षाची भूमिका काय असेल, असे विचारले असता राऊत म्हणाले, 'राहुल गांधी यांनी हा मुद्दा पुन्हा उपस्थित केल्यास काय करायचे ते पाहू. पण ते हा मुद्दा उपस्थित करणार नाहीत, याची आम्हाला खात्री आहे.