जयपूर, ता. १४ (पीटीआय) ः सीकर जिल्ह्यामध्ये एक मोटार आणि ट्रक यांची धडक झाल्याने लागलेल्या आगीत सात जणांचा होरपळून मृत्यू झाला. त्यात दोन मुलांचा आणि तीन महिलांचा समावेश आहे.

मोटारीतून प्रवास करणारे सर्व जण उत्तर प्रदेशातील मीरतचे राहणारे होते. ते हिसारहून सालासार बालाजी मंदिर येथे चालले होते. ‘‘आशीर्वाद पुलियाजवळ भरधाव मोटारीने चालत्या ट्रकला मागील बाजूने धडक दिली. त्यानंतर मोटारीला आग लागली. आग येवढी भीषण होती की कुणालाच मोटारीतून बाहेर पडण्याची संधी मिळाली नाही व साज जण त्यात होरपळून मृत्युमुखी पडले,’’ अशी माहिती फतेहपूर विभागाचे पोलिस उपअधीक्षक रामप्रताप बिष्णोई यांनी दिली.
आग लागल्यामुळे मोटारीतील प्रवाशांना दारेच उघडता आली नाहीत. यासर्वांची ओळख पटविण्याचे काम सुरू आहे, अशीही माहिती त्यांनी दिली.