गांधीनगर : गांधीनगर मतदारसंघातून लढत असलेले भाजपचे राष्ट्रीय अध्यक्ष अमित शहा यांच्याविरोधात महाआघाडीने राष्ट्रवादी काँग्रेसचे नेते व गुजरातचे माजी मुख्यमंत्री शंकरसिंह वाघेला यांना उमेदवारी दिल्याची माहिती मिळत आहे.

भाजपने ज्येष्ठ नेते लालकृष्ण अडवानी यांचे तिकीट कापून अमित शहा यांना गांधीनगरमधून उमेदवारी दिली आहे. गांधीनगर मतदारसंघात काँग्रेस आघाडीने तोडीचा उमेदवार देण्याच्या दिशेन हालचाली सुरु केल्या आहेत. काँग्रेस आणि राष्ट्रवादी काँग्रेसमध्ये अद्याप तिकीट वाटप अंतिम झालेले नाही. मात्र, शंकरसिंह वाघेला यांना निवडणुकीच्या रिंगणात उतरविण्याची तयारी झालेली आहे.

शंकरसिंह वाघेला यांनी 1989 मध्ये याच मतदारसंघातून भाजपला विजय मिळवून दिला होता. त्यानंतर हा मतदारसंघ लालकृष्ण अडवानी यांच्यासाठी सोडण्यात आला होता. आता पुन्हा एकदा अडवानींना हटविल्याने आघाडीने वाघेलांना उमेदवारी देण्याचा निर्णय घेतला आहे. काँग्रेसकडे कोणताही सक्षम उमेदवार नसल्याने राष्ट्रवादीच्या कार्यकर्त्यांकडून वाघेला यांच्या उमेदवारीसाठी मागणी होत आहे.