नवी दिल्ली : सुनंदा पुष्कर यांच्या संशयास्पद मृत्यूप्रकरणी दिल्लीतील न्यायालयाने आज काँग्रेसचे वरिष्ठ नेते शशी थरूर यांना मोठा दिलासा देताना त्यांना दोषमुक्त केले. आज याबाबत झालेल्या व्हर्च्युअल सुनावणीदरम्यान विशेष न्यायाधीश गीतांजली गोयल यांनी हे आदेश दिले. या आदेशांनंतर थरूर यांनी न्यायाधीशांचे आभार मानले असून मागील साडेसात वर्षांपासून मी अक्षरशः छळाला सामोरे जात होतो, हा माझ्यासाठी खरोखरच एक मोठा दिलासा असल्याचे त्यांनी म्हटले आहे. आज झालेल्या सुनावणीदरम्यान पोलिसांनी थरूर यांच्यावर विविध आरोप निश्‍चित करण्याची मागणी केली, यामध्ये ‘कलम-३०६’ चा (आत्महत्येला चिथावणी) देखील समावेश होता. (Shashi Tharoor News)

थरूर यांची बाजू मांडताना विधिज्ञ विकास पाहवा म्हणाले, की ‘‘ या प्रकाराची विशेष तपास पथकाच्या (एसआयटी) माध्यमातून चौकशी झाली असून या पथकाने थरूर यांना सर्व आरोपांतून मुक्त केले आहे. सध्या थरूर यांच्याविरोधात कसल्याही प्रकारच्या गुन्ह्याची नोंद नसल्याने त्यांना दोषमुक्त करण्यात यावे.’’ सुनंदा पुष्कर यांचे कुटुंबीय आणि मित्रांनी देखील त्या आत्महत्या करूच शकत नाही असे सांगताना हा चिथावणीचा प्रकार असू शकत नाही असे म्हटले होते. शवविच्छेदन अहवाल आणि अन्य वैद्यकीय अहवालांत देखील हा आत्महत्या अथवा खुनाचा प्रकार नसल्याचे आधीच स्पष्ट केले आहे. त्यामुळे पोलिसांनी केलेले आत्महत्येला चिथावणी देण्याचे किंवा क्रौर्याचे आरोप हे निरर्थक असल्याचा दावा पाहवा यांनी केला. पुष्कर यांचे कुटुंबीय, मित्रांनी छळवणूक अथवा चिथावणीची कोणतीही तक्रार दाखल केली नसल्याची बाब यावेळी थरूर यांच्या वकिलांनी निदर्शनास आणली.

गुन्हे दाखल

सुनंदा पुष्कर या १७ जानेवारी २०१४ रोजी येथील एका पंचतारांकित हॉटेलातील स्यूटमध्ये मृतावस्थेत आढळून आल्यानंतर खळबळ निर्माण झाली होती. थरूर यांच्या अधिकृत निवासाच्या डागडुजीचे काम सुरू असल्याने या दाम्पत्याचे येथील हॉटेलात वास्तव्य होते. या घटनेनंतर थरूर यांच्यावर विविध कलमांखाली गुन्हे दाखल करण्यात आले होते पण त्यांना अटक मात्र झाली नव्हती.